قطرات من النمردة
مش كل النعم بتتحس عشان مش كل الناس شوافّة.. أسهل وأغبى شيء بيعمله الإنسان من وقت للتاني بمحدودية عقله وتفكيره إنه بيضيع من بين إيديه ناس زي الدهب يتمنوله الرضا يرضى عشان ناس تانيين مايجوش في ميزان المحبة ولا القيمة 1/مليون من الأولانيين.
طبيب الأسنان الأمريكي جيمس كريغ، طبيب من ولاية كولورادو الأمريكية.. متجوز من أنجيلا بعد قصة حب كبيرة وطويلة وعندهم 6 أطفال.. أسرة مثالية أفرادها بيحبوا بعض بشكل مثالي وماكنش فيه أي فرصة لأي خلافات! بسبب تركيز أنجيلا مع زوجها جيمس وترتيبها لكل تفاصيل حياته وتنظيمها على أكمل وجه بقى جيمس واحد من أهم أطباء الأسنان في المنطقة ويمكن في الولاية كلها.. ده طبعًا تمت ترجمته لفلوس ودخل سنوي خلّى جيمس عنده ثروة محترمة في فترة قصيرة نسبيًا!
للحقيقة إن جيمس ماكنش بيستخسر حاجة في مراته ولا أولاده وكل طلباتهم مُجابة خصوصًا إنه كان بيعتبرهم شركاء في رحلة نجاحه ومالوش غيرهم.. لحد ما فيه شيطانة اسمها ماري دخلت حياة الأسرة فجأة عن طريق شغلها كممرضة في عيادة "جيمس"!.. شوية بشوية ولإنها فعلًا شاطرة في شغلها بقت ماري هي الممرضة الأساسية في عيادة جيمس وقدرت تكسب ثقته.. بس ولإنها ماكنتش شخصية أمينة هي كانت حاطة قصاد عينيها هدف تاني خالص غير التميز الوظيفي! أنا عايزة آخد مكان أنجيلا..
أنجيلا والولاد ميستاهلوش يكونوا هما أسرة جيمس.. أو بمعنى تاني كفاية عليهم لحد كده ويسيبوا الفرصة بقى لغيرهم.. وغيرهم دول اللي هي ماري نفسها! تمام.. بدأت تنسج خيوطها حوالين جيمس ووقعته في حبها وفي نفس الوقت بدأت تزن في ودانه بكلام عن إن إزاي أنجيلا مابقتش مهتمة بنفسها، وإزاي إن الأولاد بيحبوا أمهم أكتر منه، وإزاي إنهم مش حاسين بقيمة الكنز اللي حياتهم اللي اسمه جيمس! للأسف جيمس بمنتهى الهبل مشي ورا كلامها اللي ساب أثر فيه بدون ما يركز في مضمونه ولو لدقيقة وقدرت ماري تشكل مشاعره تجاه مراته وأولاده من أول وجديد للأسوأ!
في مرة وهما مع بعض سألها شايفة الحل إيه؟.. قالتله لازم أنجيلا تخرج من حياتك عشان نبتدي أنا وأنت حياتنا.. سألها أطلقها؟ قالتله لو طلقتها هتاخد نص ثروتك اللي أنت تعبت وشقيت فيها.. سألها أومال إيه الحل؟ قالت له بمنتهى الثبات الانفعالي تقتلها.. جيمس اتخض مجرد ما سمع الكلمة وبص لها وهو مستعجب وقال أنا أبقى قاتل! ردت ماري ببساطة ومين قال إنك هتتعرف! أنت دكتور يعني تقدر تعمل ده بشكل طبي يبان كإنه وفاة طبيعية، فكر وأنا واثقة إنك هتلاقي حل.
المشكلة إن أنجيلا الإنسانة الطيبة عمرها ما لاحظت تغير زوجها ولا وجود إنسانة تانية في حياته، وعمرها ما قصرت ولو للحظة في أي شيء بيطلبه زوجها منها.. على طول مهتمة بالبيت وبالأولاد وبجوزها.. فضلت الفكرة تدور في بال جيمس بشراسة وكان شايفها فكرة مقبولة بالذات إنه ماكنش هيستحمل يضحي بنص ثروته لو طلقها.. بعد حبة تفكير استقر عقله على طريقة شيطانية يخلّص بيها على أنجيلا ومن غير ما يسيب وراه أي شبهة أو سمعة سيئة.. بدأ يحط لها مادة السيانيد القاتلة بنسبة قليلة جدًا في المشروبات اللي بتشربها يوميًا في البيت، لحد ما حالتها تدهورت واضطرت تروح المستشفى.. اتعالجت وخرجت.. تعبت تاني.. دخلت المستشفى.. اتعالجت وخرجت.. لحد ما في المرة التالتة دخلت وحالتها صعبة جدًا ودخل معاها جيمس كمرافق وحقنها بحقنة كبيرة من السيانيد عشان تتعرض لتسمم حاد وتموت في لحظتها بدون ما حد ياخد باله.
حالة أنجيلا خلال تعبها وفي فترة مرضها ثم وفاتها كانوا لغز بالنسبة للدكاترة المشرفين على العلاج.. ليه إنسانة رياضية وزوجة سعيدة محافظة على نفسها وجسمها تموت مسممة! اللي عقد الموضوع أكتر كمان إن جرعات قليلة من السيانيد مش بتبان في الدم ولا في التحليل بالتالي هما كانوا قدام علامة استفهام كبيرة.. إيه سبب تعبها! بس وعشان ضباط الشرطة دايمًا عيونهم بترصد الشيء غير المتوقع كانوا حاطين جيمس في دايرة المشتبه فيهم.
وتأكدت شكوكهم أكتر لما أعلن جيمس زواجه من ماري رغم عدم مرور أكتر من 10 أيام على وفاة أنجيلا! لأ تعالى بقى نشوف حكايتك إيه.. بالتضييق عليه وبفحص كل موبايلاته وأجهزة اللاب توب بتاعته وعددها جهازين اكتشفوا إنه اشترى من أمازون جرعات من السيانيد لكن باسم مستعار وببطاقة فيزا بتاعت واحد صديقه.. واحدة واحدة بدأت تفاصيل القصة تتكشف للكل وتم حبس جيمس بعد إثبات التهمة في سنة 2023 وتم توقيع عقوبة السجن المؤبد حتى الموت عليه بسبب بشاعة تصرفه! عشان بكده يخسر كل فلوسه مش بس نصها زي ما كان قلقان وتروح الفلوس كلها لأولاده اللي فقدوا أبوهم وأمهم بسبب جشع وطمع ودناوة أبوهم.
• الحياة ساعات بتديك دروس من غير ما تاخد بالك، أهمها إن اللي في إيدك ممكن جدًا يكون أغلى بكتير من أي وهم بتجري وراه.. فيه ناس فاكرة إن النعمة بتدوم حتى لو ماحافظناش عليها، وده أكبر وهم.. النعمة محتاجة عين تشوف وقلب يصون، لكن اللي يستخف بيها بيتحول هو بنفسه لعدو نفسه.. ساعات الواحد يفتكر إن اللي حواليه هيستحملوا منه مهما عمل، وإن وجودهم أبدي، وساعات يتخيل إن عنده رفاهية إنه يضيّع ويبدأ من جديد، لكن الحقيقة إن الخسارة وقتها بتكون بلا رجعة.. قيمتك مش بس في اللي عندك، قيمتك كمان في إنك تعرف إزاي تحافظ عليه.. من لم يشكر القليل حُرم الكثير.
