نفسي ربنا وأهلي يسامحوني.. شاب متعافٍ من الإدمان يروي رحلة تعافيه: بعت كليتي عشان المخدرات وفقدت أخويا
تداول مستخدمو مواقع التواصل الاجتماعي، حلقة من أحد البرامج عبر فيسبوك ظهر فيها شاب متعافٍ من المخدرات يتحدث عن بداية إدمانه والعوامل التي ساعدته على ذلك، وبيعه كليته مقابل المال اللازم لـ شراء المخدرات.
شاب متعافٍ من المخدرات يروي رحلة تعافيه
وقال الشاب المتعافي من الإدمان في الفيديو: الإدمان بهدل حياتي ومرة صحيت لقيت نفسي في منطقة تانية، وكنت مرمي في الشارع وبنام تحت الكوبري بهدوم مقطعة ومن غير ما ألبس حاجة في رجلي، كنت متشرد بمعنى أصح وحياتي ادمرت.
وأضاف: في مرة خطيبتي عرضت عليا أبيع كليتي عشان خاطر نتجوز، فأنا قولت هيبقى معايا فلوس كتير من الموضوع ده وبالفعل عملت تحاليل عشان أبيع كليتي ومحستش إني بعمل حاجة غلط، أو فيها مشكلة فاكر كويس جدًا الشخص اللي اتفق معايا واللي عملي العملية واتبرعت لها، بعت كليتي عشان أجيب مخدرات ولما فوقت من العملية كنت بصرخ من ألم رهيب وكل همي هجيب كمية قد إيه من المخدر بفلوس العملية، واستغلوا إني كنت مدمن وادوني حقن مسكنات بكمية كبيرة.
وتابع:أخويا مات بسبب المخدرات ومفوقتش غير لما شوفته ميت، نفسي ربنا وأهلي يسامحوني إني مشيت في الطريق ده وربنا يعوضني عن حاجات كتير افتقدها في سن المراهقة وخلال الفترة اللي كنت مدمن فيها ونفسي الناس كلها تدعيلي.
