خالد الجوادي: سافيو بوّظ صفقة سوزا.. وكولر عنّف اللاعبين بسبب غرفة الملابس
كشف خالد الجوادي مترجم كولر السابق، عن كواليس جديدة عن فترة تواجد السويسري مارسيل كولر، مديرا فنيا للنادي الأهلي، مؤكدًا أن المدرب كان صارمًا لأقصى درجة في التفاصيل الصغيرة قبل الكبيرة، وأنه غيّر شكل المنظومة في غرف الملابس وأسلوب تعامل اللاعبين.
تصريحات خالد الجوادي
وفي تصريحات إذاعية، قال خالد الجوادي: كولر أول ما دخل أوضة اللبس شافها متبهدلة: زجاجات المياه على الأرض، هدوم، قشر موز، منظر عشوائي تمامًا، ساعتها ما اتكلمش، طلع تليفونه، صوّر كل حاجة، وتاني يوم عرض الصور في المحاضرة وقالهم: أنتم بتلعبوا كورة زي ما الأوضة دي باينة.. مفيش نظام.
وأضاف: طلب من اللاعبين احترام العمال، وقالهم إزاي واحد بيتعب وياخد مرتب قليل يلم وراكم؟ واللي هيكرر ده مش هيشم الملعب، وفعلًا بدأ يطبق العقوبات، والدنيا اتظبطت.
وسرد الجوادي موقفًا مثيرًا في مونديال الأندية: بعد ماتش ريال مدريد، بيرسي تاو زعل عشان ملعبش، كولر طلب يقابله، بيرسي رفض ونزل قال عامل نايم، لقيت كولر بيقوم فجأة والكرسي بيقع، وطلع أوضته، دخل عليه بالعافية، وشاله من السرير وقاله: لما الكوتش يقولك تنزل، تنزل فورًا.
وتابع: بعد ما هدي قاله: انت لعيب كبير، وبجهزك تدريجيًا، وده مش تقليل منك، من وقتها بيرسي تاو اتغيّر، وقاله: أنا وعد، وهبقى معاك، وبالفعل في نهاية الموسم خد أفضل لاعب في القارة.
وكشف الجوادي أن كولر اتخذ قرار استبعاد برونو سافيو بعد مواقف وصفها بـ عدم الانتماء: في عز أزمة الدولار، الأهلي كان بيدفع وبيجيب فلوس من تحت الأرض، لكن سافيو اشتكى من تأخير الفلوس قدام زملائه، ديانج وبيرسي تاو قالوله: دي أول مرة تحصل، لكن هو بوّظ صفقة سوزا وقاله الأهلي بيتأخر ومبيصرفش، وكولر قال: ده خيانة، ومش عايز خاين معايا.
وأشار: بعد وصول زوجة برونو سافيو إلى مصر.. وجد مارسيل كولر أن اللاعب دائم الشكوى من الإصابات، ولقينا دلع واضح منه مرة ضهري، ومرة ركبتي.. حتى قبل لقاء صنداونز في جنوب إفريقيا، وجدنا اللاعب يصرخ في التدريب بصوت عالٍ ويبكي، ويقول إنه مصاب، وشوية أفورة، كولر عرف أنه لاعب مش بتاع فريق بحجم الأهلي، ويهمه نفسه في المقام الأول، وهنا قرر استبعاده من حساباته تمامًا.
وتطرق الجوادي إلى أزمة أحمد عبدالقادر مع كولر، وقال: كولر كان مؤمن بموهبته بس مشكلته كانت في القرار داخل الملعب، كان بيقوله: اعدي واخد قرار، وانا هغطيك في الإعلام، بس عبدالقادر كان يرجع يزود في المهارات، كولر صبر كتير، ولما فقد الأمل، بدأ يركنه، في مرة زقّ إيده بعد ماتش واعتذر بعدها، وقاله: بابا وماما قالولي أنت الراجل اللي دافعت عني، كولر قالّي: مش هشخصن، بس اللاعب لما يدخل سكة المظلومية عمره ما هيتطور.
أوضح الجوادي أن كولر عاش صدمة حضارية بعد وصوله إلى مصر: رغم اقتناعه بمشروع الأهلي، لكنه فوجئ بتفاصيل الحياة والزحمة وغيرها، وكان ده عامل ضغط في البداية، لكنه اتحول لشخص تاني لما بدأ يسيطر على الفريق.
كما كشف رفض كولر لصفقة مصطفى شلبي: قالهم لأ.. عندي لعيبة أفضل منه، وعقليته لا تناسب الأهلي، فنيًا ومهاريًا.
