أحمد السقا: منى زكي وهند صبري إخواتي وليهم أفضال عليا
أكد الفنان أحمد السقا أنه تجمعه علاقة صداقة قوية بكل من الفنانة منى زكي والفنانة هند صبري.
وقال أحمد السقا خلال ندوته في القاهرة 24: منى زكي وهند صبري دول إخواتي، لهم أفضال كتير عليا، ولما هند صبري طلبتني في عايزة أتجوز روحت على طول.
أحمد السقا يكشف كواليس عايزة أتجوز
وحول كواليس مسلسل عايزة أتجوز، أضاف السقا: هند صبري كلمتني قالتلي هنصور ساعتين بس، هند أختي وأفضالها كتير عليا، فروحت أصور ووقتها كنت عامل عملية في الأحبال الصوتية وصوتي المتغير ده كان بجد مش قاصده، خرجت من المستشفى عليهم.
وأردف: أول مشهد صورناه اللي كنت بدور فيه في الشقة، وكان فيه مشهد المطاردة وقولت لـ أستاذ رامي أكيد مش هتخلص كدة ولازم يورطها في مصيبة، كلمت عمرو مجايفر وجه وعملنا مشهد العربية وكله في 6 ساعات.
أحمد السقا: شيرين عبد الوهاب نعمة من ربنا
وتحدث أيضًا أحمد السقا عن الفنانة شيرين عبد الوهاب، قائلًا: شيرين عبد الوهاب نعمة ربنا ادهالنا وهي عشرة عمر من أكتر الناس اللي قعدت بيا في المستشفيات.. وهي مش محتاجة نصيحة ولكن محتاجة حد أمين عليها وبضايق من الانتقادات اللي بتتعرض ليها وإحنا عندنا فنانين المفروض إحنا اللي نحافظ عليهم مثل الفنانة أنغام والفنانة آمال ماهر.
