حصل لي تليف بسبب الفيلر.. نجلاء بدر تكشف لأول مرة سبب إجرائها عملية تجميل: مش ندمانة على قراري
كشفت الفنانة نجلاء بدر لأول مرة تفاصيل خضوعها لعملية تجميل بالوجه، موضحة أنها أصيبت بتليف في جزء من وجهها بسبب الفيلر وأن الجراحة التجميلية هي الحل الأمثل لـ ما تعاني منه من مشكلات بسبب حقن الفيلر، مؤكدة أنها لم تندم على عملية التجميل على الإطلاق بل وإنه أفضل قرارات حياتها.
نجلاء بدر تكشف لأول مرة سبب إجرائها عملية تجميل
قالت نجلاء بدر، في ندوة تكريمها بـ القاهرة 24: فيه دور استدعى أني أحقن فيلر كنت رفعت حواجبي زي الشيطان وأعتقد عملت خدودي، لأن الشخصية كانت فنانة ونجمها واقع وعايزة تعمل في نفسها أي حاجة علشان تلفت النظر، ووقتها كان موضة حكاية الفيلر ولسه طالعة ومكنش حد بيجرؤ إنه يقول، ولكن أنا عملتها ولما بشوف المشاهد دي بضحك، ودلوقتي معملهاش وبدأت أقرأ عن خطورة الفيلر وعلى فكرة مبتدوبش.
وأضافت نجلاء بدر: أنا خدت سنين علشان يدوب الفيلر ومبتدوبش، حتى إذابتها بيعمل مشاكل علشان المادة ممكن تعمل حساسية وبتدوب حتت آه وحتت لأ، وبتلاقي حتت عالية وحتت واطية وبتاخد وقت طويل عشان تتخلصي منها، والفيلر عملي تليف في حتة ومراحتش، واللي خلاني أعمل عملية تجميل أني مش عايزة أحقن فيلر وبوتوكس.
وواصلت: مشكلة الفيلر إنه بيتضخم، هي مادة جيلاتينية بتتنفش ومبتروحش ولا بتدوب، هي بعد فترة بتقل كثاقتها وبترجعي تحقني عليها وبالتالي حجم الرأس بيكبر عن الكتاف وده حصل مع بعض الفنانات.
نجلاء بدر: عملية التجميل أسرع وأحسن قرار في حياتي
وأوضحت نجلاء بدر أنها ليست نادمة على إجراء عملية التجميل، قائلة: أنا لقيت إن العلاج للحاجات اللي كنت متضايقة منها الجراحة هي الحل الأمثل، والفرق في الجراحة أننا مبنغيرش الشكل ولكن بنشيل الترهلات، رفعنا الجلد والعضلة وده مبيغيرش الشكل ولكن بيرجعني أصغر، وبقول إن التجميل أسرع وأحسن قرار خدته في حياتي ومش ندمانة عليه خالص.
وعن سبب إعلانها إجرائها عملية تجميل، فعلقت نجلاء بدر: أعلنت علشان مندخلش في جدل والناس تجيب الصور من عند الدكتور ويقولوا دي عملت تجميل، أنا وفرت لنفسي الجدل والمهاترات وقلت أنا عملت عملية.
