رد كليتي.. هل سيتناول محمد سامي في مسلسله الجديد قصة بوجي المتعافي من المخدرات؟.. المخرج يجيب | خاص
كشف المخرج محمد سامي، تفاصيل مسلسله الجديد “رد كليتي”، بعد إعلان عودته من قرار اعتزال الإخراج التليفزيوني مؤخرًا، مؤكدًا إنه لم يقرر حتى الآن المشاركة في السباق الرمضاني المقبل لعام 2026.
وقال محمد سامي في تصريح خاص لـ القاهرة 24: أنا تحمست لفكرة المسلسل وأنا قاعد بكتب، لقيت إن أنا ماسك موضوع وربنا سبحانه وتعالى كارمني بموضوع قريب من القلب ويوصل للقلب، وتلقيت دعم نفسي غير عادي من الناس، وقريت كومنتات إنه عن قصة بوجي، ودخلت وشفت لقاءه والموضوع ملوش علاقة بقصة بوجي خالص، ولا من قريب ولا من بعيد.
مسلسل محمد سامي الجديد
وتابع المخرج: اسم المسلسل اللي هو “رد كليتي” بنسبة 90% هيتغير، أنا حطيته عشان يدي انطباع معين مبدئي عند الجمهور، والاسم الجديد هيخلي الجمهور يفكر أكتر، ولسه مش عارف الموضوع هيكون امتى، الناس مفكرة أني هكون موجود في رمضان ده، لسه معرفش مين أبطاله أو اي تفاصيله أنا في حساباتي أني اكتب مشروع جيد جدًا فقط.
وسبق وأعلن المخرج محمد سامي، عودته للإخراج التليفزيوني من جديد بعد قرار اعتزاله بعد شهر رمضان الماضي، وكتب عبر حسابه الشخصي بـ فيس بوك: رد كليتي للمخرج محمد سامي، بسم الله، بكتب مسلسل جديد، سيكون بأمر الله الأهم في مسيرتي الفنية والأعلى مشاهدة وجدل وحكاية جديدة لم يتم تناولها من قبل في أي عمل فني سواء عالمي أو محلي، هصور إمتى ومين الأبطال وهينزل إمتى؟!!، كل ده معرفوش لسه ولا في بالي.
وأضاف محمد سامي: اللي أعرفه أنه هيكون أرقى وأميز أعمالي وسيكون عملا يحترمه ويقدره كل بيت عربي، إدعولي يخلص بنفس القوة اللي بدأ معايا بيها، اللي مفرحني في العمل ده، إني كنت بحاول ألاقي معادلة صعبة جدا بالنسبالي وهي إزاي العمل الجماهيري النهاردة بمتطلبات السوق يكون فني بحت زي أعمال كتير اتقدمت زمان من أساتذتنا وإزاي أقدر أخد موضوع يهم المجتمع لقوة الجذب اللي اعتادها الجمهور العربي مني.
وأستكمل محمد سامي،: ما تبقاش مشاهداته محدودة أو نخبوي مع احترامي لمحبي الأعمال النخبوية، وإزاي أغير تماما عن كل حاجة قدمتها وأعمل بنصيحة الأستاذ طارق الشناوي وهي التغيير قبل تشبع الجمهور والحمد لله لقيت ده في مشروعي الجديد، الله الموفق ويكمل إن شاء الله على خير.
