أحمد سعد: عمرو أهم واحد في حياتي.. وكنت عايز أعفيه من الحرج في كليب أخويا دا
كشف الفنان أحمد سعد، تفاصيل مشاركة شقيقه الفنان عمرو سعد، في كليب أغنيته أخويا دا، والتي طرحها مؤخرًا ضمن أغاني ألبومه الجديد، الذي حقق نجاحًا كبيرًا من خلاله.
وقال أحمد سعد، في لقائه مع الإعلامية منى الشاذلي، في برنامجها معكم: عمرو سعد أهم واحد في حياتي على الإطلاق، كل يوم بكلمه فترات طويلة بالساعات وبسأله في كل حاجة.
وتابع أحمد سعد: في أغنية أخويا دا قلت هو أنا هستغله عشان أخويا وأقوله أطلع معايا في الكليب؟، رحت قلتله لقيت أن الأغنية مش نافعة خالص أننا نطلع مع بعض عشان عايز أعفيه من الحرج، وقلت له مش هينفع نطلع مع بعض وهتتربط أن الأغنية دي للإخوات بس، هو فهم وعرف أني مكسوف وصمم يطلع معايا في الكليب.
أحمد سعد: عمرو نجمي المفضل ويجمعنا عمل فني قريبًا
وسبق أن تحدث الفنان أحمد سعد، عن شقيقه عمرو موضحًا أنه سيجمعهما عمل فني قريبًا، قائلًا: عمرو سعد نجمي المفضل وأنا بحبه على المستوى الشخصي، ومش بس عشان هو أخويا ولكن هو أخ لذيذ وإنسان جميل، وديمًا معايا ومبيسبنيش في أي حاجة.
وعن كواليس أغنية أخويا تابع: لما جيت طلبت منه يطلع معايا في أغنية أخويا كانت حاجة غريبة مني لأن مينفعش أطلب من نجم كبير زي عمرو ولكن هو خد الموضوع بحب وان شاء الله يبقى في بينا تعاون فيلم قريبًا.
