مدين: غياب شيرين عبد الوهاب غصب عنها.. وبتطمن بوجودنا حواليها
حرص الملحن مدين، على توجيه رسالة دعم للفنانة شيرين عبد الوهاب، بعد ما طرحت أغنيتها الأخيرة غالية علينا يا بلادنا بالنسخة الماستر، موضحًا أنه سيجمعه بها تعاون خلال الفترة المقبلة.
وقال مدين، في لقائه مع القاهرة 24: شيرين عبد الوهاب أغلى الناس عندي وعشرة عمري ونعرف بعض من وإحنا صغيرين، عايز أقولها إحنا في ضهرك يا شيرين، وهي دايمًا بتطمن بوجودنا حواليها.
وأضاف: مبسوط برجوعها من جديد مع مجموعة كبيرة زي عمرو مصطفى وتامر حسين وتوما، مبسوط بتوقيت نزول الأغنية، وإن شاء الله هيكون في أغاني لينا مع بعض هتنزل الفترة اللي جاية، إحنا حققنا نجاحات كتير مع بعض زي حبه جنة وكلام عينيه.
ووجه مدين، رسالة لجمهور شيرين عبد الوهاب، قائلًا: عايز أقول للجمهور إن شيرين أكتر فنانة عفوية، وعايز الناس متقفش ليها على الواحدة، غيابها بيبقى غصب عنها، ورجوعها بتبقى مستنية مننا ندعمها، عايزين كلنا نقف معاها ونقولها متوقفيش غناء أبدًا.
شيرين عبد الوهاب
وكانت أعلنت الفنانة شيرين عبد الوهاب في وقت سابق، عن أغنيتها الجديدة، التي تحمل عنوان غالية علينا يا بلادنا، وهي من كلمات تامر حسين، وكتبت شيرين عبر حسابها الرسمي بـ فيسبوك: جمهوري الغالي ألف شكر لدعواتكم اللي بتوصلني في كل مكان انتظروا أحلى مفاجأة من أحلى شيرين وأحلى عمرو مصطفى وتامر حسين وتوما، لأحلى بلد في الدنيا.
