جنات: مش هغيب تاني عن الجمهور.. ومفيش حاجة بتعوض نجاح الألبوم
تحدثت الفنانة المغربية جنات، عن نجاح ألبومها الجديد ألوم على مين، الذي عادت من خلاله من جديد لطرح الألبومات بعد فترة غياب.
وقالت جنات، في حديثها مع القاهرة 24: فرحت جدًا بالألبوم لأني بقالي كتير معملتش ألبوم، وبالرغم من أني بعمل أغاني سينجل بتبقى لذيذة والناس بتحبها، بس الألبوم كان على طول جوايا أن في حاجة ناقصاني، كان لازم يكون في ألبوم.
وأضافت جنات: الألبوم ليه إحساس تاني خاصة لما بيبقى ليك تجارب في ألبومات قبل كده الناس بتتعود عليك على شكل معين، وأنا مقتنعة أن مفيش حاجة بتعوض الألبوم بالنسبة ليا، ودي البداية ومش هغيب عن الناس في الألبومات تاني.
جنات تكشف إمكانية دخول ابنتيها المجال الفني
وعن إمكانية دخول ابنتيها المجال الفني، علقت جنات قائلة: مفضلش يدخلوا مجال الفن دلوقتي علشان دراستهم صعبة، مش زي أيامنا كانت الدراسة أبسط وأسهل، وأظن أنهم لو حابين يدخلوا المجال وعندهم هواية هيبقى لما يكبروا شوية، أنا بربي ولادي كويس لغاية سن معين، المهم يكونوا على القيم والأسس الصحيحة والأخلاق الكويسة، وبعدها ياخدوا قراراتهم لوحدهم.
ألبوم جنات ألوم على مين
وعلى جانب آخر، سبق واحتفلت الفنانة جنات، بطرح أحدث ألبوماتها الغنائية والذي حمل عنوان ألوم على مين، وذلك بأحد الفنادق الكبرى بالقاهرة الجديدة، وظهرت جنات خلال الاحتفال وهي رفقة زوجها، وابنتيها أيضًا، وحرصت الفنانة نسرين طافش وزوجها على دعم الفنانة جنات بـ انطلاق ألبومها ألوم على مين.
