زوجة ضحية سائق ميكروباص التجمع: جوزي اتقتل وهو راجع من شغله وساب بنت رضيعة
خيّم الحزن على أسرة شاب في الـ27 من عمره، بعد مقتله على يد سائق ميكروباص بمنطقة التجمع الخامس، عقب مشادة كلامية بينهما انتهت بجريمة مأساوية.
زوجة ضحية سائق ميكروباص التجمع
وقالت زوجة المجني عليه في بث مباشر عبر القاهرة 24: إن الواقعة بدأت عندما كان زوجها في طريقه للعمل مستقلًا ميكروباص، ليتفاجأ بمعاكسة السائق فتاة لفظيًا داخل السيارة، قائلة: زوجي لما شافه بيعاكس البنت قاله عيب ما ينفعش تعمل كده، لكن السواق مسك فيه واتخانق معاه.
وأضافت زوجة الشاب: السواق استعان بـ4 أشخاص واعتدوا على جوزي بالضرب، لحد ما ضربه السواق بمفك في ودنه، ومات في لحظتها وهو راجع من الشغل.
وأكملت الزوجة باكية: آخر مرة شفت جوزي يوم الحادثة قبل ما ينزل يروح الشغل، شغل قرآن في البيت وصلى الجمعة، وقال لي رايح ساعتين وهرجع، حتى كلمني قبلها بنص ساعة وقال لي حضري الأكل، بس رجع لي جثة، وكنت مستنياه يتغدا معانا لكن جاني خبر وفاته.
واختتمت الزوجة حديثها قائلة: بنتي لسه مولودة، مكملتش 15 يوم، اتحرمت من أبوها، وأنا مش عاوزة غير حقه، مطالبة بالقصاص لزوجها.
وكانت الأجهزة الأمنية بالقاهرة تلقت بلاغًا بمقتل شاب على يد سائق ميكروباص بالتجمع الخامس إثر مشادة نشبت بينهما بسبب دفاع الضحية عن فتاة، وتم تحرير محضر بالواقعة، وأخطرت جهات التحقيق لتولي التحقيقات.
