الناس علمتني
كنت فاكر إن الطيبة والجدعنة والشهامة وجبر الخواطر سر الدنيا الحلوة، كنت مصدق إن اللي يقف مع الناس هيلقى نفس الوقفة يوم ما يقع أو يتعب، كنت عايش على فكرة إن النية الصافية تكفي، وإن الإخلاص والحب أقوى من أي شيء وأساس حاجات كتير، كنت بصدق إن الخير يرجع خير.. حتى لو اتأخر شوية.
لكن مع الوقت اكتشفت إن القيم اللي كبرنا واتربينا عليها ممكن تتقلب وتتغير بسهولة، وإن الدنيا مش بتفتح أبوابها للي يحسبها بضمير.. بتفتحها للي يعرف يلعبها بذكاء، أحيانًا ببرود، وأحيانًا بقسوة، بتفتح أبوابها لما تتعلم تبقى نسخة جديدة من نفسك.. نسخة ممكن تكون أنت نفسك مش عارفها.
الناس علمتني، إنك لما تقف دايمًا أول واحد هتكون أول واحد يتنسي، إن اللي يدي بلا حدود، يفوق في يوم يلاقي نفسه مش موجود حتى في خريطة حد.
إن اللي يرد بسرعة علشان يجبر خاطر أو يعمل مساعدة قيمته تقل، إن اللي يدي قلبه من غير حساب، قلبه يتاكل وهو صاحي، علمتني إنك لو فضلت طيب طول الوقت هتكون وليمة سهلة في عزومة قلوب جعانة.. هتتصدم لما تكتشف إن الجدعنة اللي كنت بتفتخر بيها، عند غيرك مجرد فرصة للاستغلال.
شفت بعيني، إن أول إيد تتمد هي أول إيد تتقطع لما المصالح تتغير، إن اللي يحب ويبني الناس من قلبه، هما أول ناس يهدموه من غير ندم، إن اللي يطبطب على وجعهم هم أول ناس يسيبوا وجعه ينزف لوحده.. علموني إن لما القيم تتبدل النجاح ممكن يجي أسرع، لكن بيجي ومعاه ثمن تقيل أوي، سؤال بيلح كل ليلة، هل ده فعلا الطريق اللي كنا عايزينه؟،
هل ده العالم اللي نستحق نعيش فيه؟
فاضطريت اتغير، مش علشان أبقى قاسي، واتباهى بالقسوة، لكن علشان ما اتاكلش حي، طلعت نسخة جديدة من نفسي
نسخة تحط حدود، نسخة تعرف تقول لأ من غير ما ترتعش، نسخة تبص في عين اللي قدامها وتقول: “مش كل حضن أمان.. ومش كل ابتسامة حب”.
بس الثمن كان تقيل، نجاح يجي أسرع أه، لكن يجي ومعاه وجع الوحدة، وسؤال يلح كل ليلة: هل ده الطريق اللي كنا عايزينه؟.. هل دي النسخة اللي تستحق نعيش بيها؟
ورغم كل اللي حصل.. لسه جوايا حنين للنسخة القديمة، نسخة كانت تعرف تحب من غير خوف، وتسامح من غير ما تحسب، وتدي من غير ما تستنى مقابل، وتجبر وهي سعيدة، لسه في قلبي طفل عايز يصدق إن الخير لسه موجود، إن فيه ناس لسه عندها قلب صافي مماتش.
الناس علمتني، إن الحماية واجبة، لكن القسوة اختيار، إن الحذر ضرورة، لكن قتل إنسانيتك جريمة، إنك تحط حدود أه، لكن مش تموت القدرة على العطاء، إنك تتعلم تقول لأ.. تمام.. لكن تفضل قادر تقول كلمة نعم كمان لما تحس إنها هتطيب قلب.
اوعوا تنسوا.. أقوى انتصار في الحياة مش إنك تتحول لحد ما بيرحمش، أقوى انتصار.. إنك تفضل بني آدم، تفضل إنسان، وتحافظ على قلبك سليم حتى وأنت بتحميه.
احمي نفسك أه، بس ما تسيبش وجعهم يحولك لوحش، خلي الطيبة جواك بس تكون طيبة بوعي، خلي القوة في قلبك بس تكون قوة برحمة، خلي التسامح يعيش.. بس يعيش بكرامة، ولو لسه جواك النسخة القديمة حافظ عليها، خليها تطلع،
ده مش ضعف، ده أعظم بطولة؛ لأن فيه زمن بيكافئ القسوة وتبقى هي السائدة.
أعظم شجاعة هي إنك تفضل إنسان.. ارجعوا لإنسانيتكم قبل ما تتسرق منكم وأنتم لسه عايشين، ابعتوا الكلمة دي لحد بتحبوه، يمكن تكون هي الفرصة الأخيرة.. إن حد فينا يفتكر إن جوه كل واحد مننا قلب لسه قادر يحب، حتى بعد كل الخيبات، والآهات والهموم اللي مرت علينا.. "ارجعوا لإنسانيتنا".
