الأمن يفحص فيديو تعدي أب على أبنائه وزوجته واحتجازهم داخل غرفة
تفحص الأجهزة الأمنية بوزارة الداخلية، فيديو نشرته إحدى الفتيات يظهر تعدي والدها عليها وعلى أشقائها ووالدتها، واحتجازهم داخل غرفة لساعات متواصلة.
وقالت الفتاة في منشورها: أنا بستغيث بأي حد في البلد اللي المفروض فيها قانون يجيب حق أي حد ليه حق، المفروض إن اللي في الفيديو ده أَبُويا اللي المفروض يحمينا هوا هوا اللي بيموت فينا بقالنا سنتين على الحال ده، قبل الضرب ده ف الأول قفل علينا الشقة، الساعه 3 فجرآ وبيقول لازم حد فينا يخلص على التانى لازم حد يموت النهاردة وبداية المشكلة المرة دي كان حبسنا كلنا في الأوضة وممنوع حد يطلع حتى للحمام ماما بس طلعت للحمام وهنا كانت البداية، لا حد عارف يدخل ولا حد عارف يسكته، وطبعًا من سنتين ضرب وإهانة وتكسير لينا ولماما.
وأضافت: إحنا خمس أخوات من ضمنهم طفلين لو قدرت احمى نفسي غصب عني مش قادره أحميهم، لو الجيران الللي في الشارع مكنوش كسروا الباب ودخلو خلصونا من ايده كان موتنا والجيران لحقونا النهارده الله أعلم المرة الجاية هيلحقونا امتى؟ حضرته مش متحمل أي مسؤولية عننا كلنا وده طبعا مش كفاية بالنسبة له، لازم يكسر فينا كل يوم بطريقة مختلفة، ومحدش يسألني سبب كل ده إيه، ممكن تسألوه لأن إحنا عجزنا إننا نعرف السبب أو ذنبنا إيه أصلًا في كل ده. وطبعًا ده مشكلة واحده فقط من ضمن المشاكل اللي بتحصل كل يوم عادي ولا جيران قادرين يمنعوه ولا أهل ولا غيره بس فيه حكومة فى البلد، طبعا إحنا لا عارفين ناخد حقنا ولا حد قادر يسكته ولا بيسكت أصلا.
وطبعًا بعد الفيديو ده كلكم عارفين لو تليفوني اتقفل يبقى مين، ولو حصل لي حاجة أنا وإخواتي يبقى مين ومن 2023 وإحنا رافعين قضايا وأرقام المحاضر موثقة بالتواريخ، الله الحق والمنتقم الجبار.
وختمت: أتمنى حد يسمع ندائي، أتمنى حد يقدر يمنعه من إيذائنا، أتمنى نقدر نتنفس بس، يسمح لينا إننا نتنفس مش أكتر من كده، بس نقدر نتنفس بأمان وننام ساعة واحدة بأمان من غير خوف إحنا مش في غابة، وأنا ليّ صوت ولازم يتسمع، لازم حد يسمعنا.
