بيحبوا بعض زي الأخوات.. صورة لـ 3 فتيات تتصدر التريند في أول يوم دراسة
تصدر وسم فتيات أول يوم مدرسة مواقع التواصل الاجتماعي خلال الساعات الماضية، بعد انتشار صور ثلاث فتيات تجمعهن صداقة قديمة منذ أيام الحضانة، حيث لاقت الصور آلاف الإعجابات والتعليقات التي عبّرت عن الإعجاب ببراءة الأطفال ونقاء صداقاتهم.
صداقة منذ الطفولة
وقالت والدة الطفلة جميلة شمس لـ القاهرة 24: اللحظة كانت تلقائية جدًا، حبهم لبعض صافي ومفيهوش أي حسابات، أول ما شافوا بعض حضنوا بعض بسرعة، وهما أصحاب من أيام الحضانة من أربع سنين، من وقت ما كان عمرهم 9 شهور.
وأضافت: دخلوا المدرسة سوا وإحنا كأمهات كمان قريبين من بعض.. اتفاجئنا بانتشار الصور، والتعليقات كانت كلها حب ودعوات ربنا يباركلهم في صداقتهم.
وأكدت أن الصور أعادت للناس ذكريات صداقاتهم الأولى المليئة بالحب والعفوية، متمنية أن تستمر هذه العلاقة بين الفتيات كأخوات أكثر من مجرد صديقات.
انتشار غير متوقع
أما والدة الطفلة لي لي، فقالت: أنا اللي صورتهم بشكل عفوي ومكنتش متخيلة إن الصور تنتشر كده، الصداقة اللي بتبدأ من الطفولة هي اللي بتكمل، والبنات شافوا الصور وفرحوا جدًا إن الناس حبتهم، لكن لسه معندهمش وعي كامل بالسوشيال ميديا عشان سنهم صغير.
مفاجأة على السوشيال ميديا
ومن جانبها، أشارت والدة الطفلة دانيا عُمر إلى أنها فوجئت بالانتشار: أنا كنت نايمة وصحيت لقيت الصور مليت السوشيال ميديا، بنتي فرحت جدًا لما عرفت إن صورها مع أصحابها انتشرت، بس طبعًا مش فاهمة تفاصيل السوشيال ميديا.
ولاقى المشهد تفاعلًا كبيرًا من المتابعين، الذين رأوا في الصور مثالًا نادرًا للبراءة ونقاء الصداقات في الطفولة، وتمنوا للفتيات مستقبلًا مليئًا بالحب والوفاء.
