ننشر أقوال ضحية عقر كلب زوجة عصام الحضري: الكلب هجم عليا وعضني |خاص
حصل القاهرة 24 على محضر واقعة عقر كلب زوجة الكابتن عصام الحضري، حارس مرمى منتخب مصر السابق، لـ مهندسة بأحد شواطئ الساحل الشمالي.
ننشر أقوال ضحية عقر كلب زوجة عصام الحضري
وجاء نص المحضر كالتالي:
س: ما تفصيلات ومضمون ما حدث ؟
ج: اللي حصل إني كنت في البحر بقرية بلومار وطالعة من البحر ورايحة الشاليه بتاعي وأنا في الممشى العام شوفت كلب حجمه كبير ومن غير كمامة وقافل الممشى، ووقتها، أنا كنت عايزة أعدي بس خوفت من شكله، وواحدة كانت ماسكة الكلب وأنا بنادي عليها وهي مكانتش منتبهة ومعاها تليفون لغاية ما الكلب هجم عليا ووقعني على الأرض وعضني في إيدي اليمين.
وتابعت: من صوت صريخي هي انتبهت وخرج زوجها عصام الحضري وأخدها وأخد الكلب ومشيوا، وبعد كده روحت المستشفى، وعليه حضرت لاتهام حائزة الكلب وصاحبه بالتسبب في إصابتي وهو ده كل اللي حصل.
س متي وأين حدث ذلك ؟
ج: الكلام ده حصل بتاريخ 22/8/2025 بقرية بلومار العلمين.
س: ولماذا لم تقومي بالإبلاغ في حينه؟
ج: أنا كنت تعبانة ومنهارة من الموقف ومقدرتش أحرر المحضر في وقتها وسافرت لأني من سكان القاهرة وكنت بصيف في العلمين.
س: أمام من حدث ذلك؟
ج: أمام نهاد، وهبة، وجميع المتواجدين بالقرية.
س: ما الضرر الواقع عليك؟
ج: ضرر نفسي وجسدي ومعنوي أنا اتصبت من عضة الكلب والموقف أثر فيا نفسيا.
س: ما صلتك بالمشكو في حقها؟
ج: معرفهاش، هي من سكان القرية وكانت موجودة بالممشى محل الواقعة.
س: هل يوجد خلافات سابقة؟
ج: لا.
س: هل تتهمي أحدا بشيء؟
ج: أيوة أتهم حائزة الكلب وصاحب الكلب في إهمال حراسة الكلب والتسبب في إصابتي والتسبب في الضرر النفسي والجسدي والمعنوي.
س: ما اسم وعنوان المشكو في حقه؟
ج: أنا علمت إن اسمها صابرين ومقيمة بفيلا الكابتن عصام الحضري.
س: ما قصدك من أقوالك؟
ج: اتخاذ اللازم قانونا.
س: هل لديك أقوال أخرى؟
ج: أيوه أنا عايزة أضيف إفادة طبية بتاريخ دخولي مستشفى العلمين يوم الواقعة وصور للعضة.
