لاعبة الشطرنج شروق وفا: هبطل العب شطرنج باسم مصر
كشفت لاعبة الشطرنج شروق وفا، أنها سوف تتوقف عن لعب الشطرنج باسم مصر، مشيرة إلى أنها بدأت بالفعل خطوات التغيير إلى أيرلندا، موضحة أن ذلك يعود لعدة أسباب لم تكن ترغب في الحديث عنها، لكن جزء منها يتعلق بالاتحاد المصري للشطرنج، على حد وصفها.
وقالت وفا في منشور عبر حسابها على موقع فيسبوك: الناس القريبين مني كلهم عارفين إني هبطل العب شطرنج باسم مصر وبدأت خطوات التغيير لأيرلندا، طبعا بعد تحقيق أكتر من 20 ميدالية ذهبية للبلد على مدار 15 سنة، ومكنتش ناوية أقول الأسباب في العلن، لكن هناك ما يستدعي ذلك.
وأضافت في منشورها حول شقيها لاعب الشطرنج أيضًا حامد وفا: بيقولوا مختاروش حامد لبطولة أفريقيا تحت 20 سنة عشان مستواه قل بجد.. والبطولة اللي قايلينها كمثال، اللي هي العرب في المغرب هما مبلغين إن حامد مش هيسافر من قبلها أصلًا وهو فارق في الريت عن زمايله ساعتها، وحامد طلع الرابع تحت 20 وديفيد تحت 18 مش نفس البطولة، وديفد واخد منها IM مش محتاج اللقب ولا حاجة وأحنا سكتنا ومكتنباش حاجة.
وتابعت: ده طبعًا حصل بعد المهزلة بتاعة كاس العالم سيدات، رفضوا يطلعوا لنا قرار وزاري على أساس إن فيها جوايز مالية فاعادي أطلعوا على حسابكوا، ووقفنا في المطار مكناش هنعرف نسافر عشان جورجيا محتاجة تصريح أمني أو قرار وزاري ومسافرناش الا لما غيرنا التذكرة على السعودية.
وأردفت: قبلها بطولة أفريقيا (أنا اللاعبة الوحيدة اللي خدتها 5 مرات) مدير البطولة كل جولة كانت بتتأخر من ربع لتلت ساعة على ما ضيوف يجوا يعملوا النقلة الافتتاحية، وفي يوم اتأخرنا عشان باباه يتصور الصورة دي، وأما في يوم بقى حصل حادثة في الطريق وكنا 3 لاعبين منتخب هنخسر بالانسحاب بلغناه ورفض يأجل الجولة وسبحان الله اليوم الوحيد اللي يبدأ في معاده وكان بيأجلها عشان لاعبين تانيين عادي، والبطولة كانت هتضيع مني بسبب كده أساسًا عشان وصلنا قبل الانسحاب بدقيقتين بس عادي المهم هو وأهله يتصوروا في الحفلة.
شروق وفا: هبطل العب شطرنج باسم مصر
وواصلت حديثها: قبلها بطولة الزون في نيجيريا اللي بتأهل لكاس العالم والـ Grand Swiss واتأهلتلها كأعلى تصنيف في القارة، وعدوني بتغطية التكاليف ولما تعبت هناك وجالي تيفويد ومتوفقتش طبعا قالوا خلاص مانتي مجبتيش مركز هنكلم الوزارة نقولهم ايه ومرجعش أي تكاليف، واتأهلنا بعد الأوليمبياد لكاس العالم قارات اللي مفيش غير 10 دول في العالم بتلعبه والاتحاد رفض يطلعنا برده عشان ميدفعش 1000 يورو اشتراك، ولا الأوليمبياد نفسها أصلًا اللي من 15 سنة بيطلع معانا إداريين يضرونا أكتر ما بينفعونا، وكل ده وعمري ما كتبت حاجة وكنا بنحاول نتفاهم معاهم وديًا بالكلام بس من غير أي فايدة لحد ما خدت القرار إن مش هلعب مع المنتخب تاني، بس خلاص فاض الكيل.. المنظومة أساسا غلط عشان لو منصب مفيهوش مرتب مفيش حد أكيد فاضي يتطوع، ومش هيدخل فيه الا لو بيطلع منه مصالح، بس مستوى الانحطاط الحالي غير مسبوق ولا يشرفني أن أمثل مصر مع وجود الاتحاد الحالي، وبالتوفيق.
