وليد صلاح الدين: الأهلي لما بيقع ليه 1000 قومة
عبّر وليد صلاح الدين مدير الكرة في النادي الأهلي عن سعادته البالغة بفوز الأحمر في القمة 131 على الزمالك بهدفين مقابل هدف، في ختام الجولة التاسعة من مسابقة الدوري الممتاز.
تصريحات وليد صلاح الدين
وقال وليد صلاح الدين في تصريحات تليفزيونية: مبروك للأهلي والمجلس والجماهير واللاعبين الرجالة في ظل الظروف الصعبة وهارد لك للزمالك والمجلس والجماهير، وكل الناس اللي قالت مش هنتفرج على مباراة حلوة عشان الفريقين في أسوأ أحوالهم فإحنا النهاردة قدمنا مباراة تليق باسم أكبر فريقين في مصر والمباراة كانت ممكن تطلع بعدد أهداف أكبر من كدة وألف مليون مبروك لكل اللاعبين الرجالة وكل الغائبين مستنيينهم يرجعولنا بألف سلامة.
وأضاف وليد صلاح الدين: عايزين نهدى وعايزين الجماهير تثق في اللاعبين والجهاز الفني وإحنا ماشيين على المسار الصحيح ومتصدقوش 90% من الحاجات المغلوطة اللي بتتكتب، عندنا مصادر رسمية بتوضح فمتروحوش مع الأخبار اللي بنسبة تتعدى 90% كلها كذب وأتمنى إن الجماهير تعي.
وأكمل وليد صلاح الدين: عندنا مباراة مهمة بعد أيام وهنعيد الحسابات في فترة التوقف الدولي، ومكملين فالشغل لحد ما نخلص مباراة كهرباء الإسماعيلية.
وأردف: أول 10 دقائق مكناش كويسين لكن بعد كدة إحنا سيطرنا على الملعب كله.. وبعد ركلة الجزاء كنا أحسن بكتير بردو.. وبشكر كل اللاعبين اللي نزلوا، وأدّوا الكابتن عماد النحاس حقه.. قدر يلم الفريق في وقت قصير وصعب جدًا.
وواصل وليد صلاح الدين: ملف المدير الفني مع الخطيب ولجنة التخطيط ولسة مفيش حاجة وبيبقا فيه أسباب مختلفة للرفض زي إن المدربين مش عايزين يجوا المنطقة العربية.
واختتم وليد صلاح الدين تصريحاته، قائلا: الأهلي لما بيقع ليه 1000 قومة.
