مطاردة الواحات الجديدة.. فتاة تكشف تفاصيل تعرضها لمضايقة من سائق: كان مشغل أغاني خليجية وخبطنا وهرب

استغاثت فتاة بسبب تعرضها لمضايقة على طريق الواحات  قبل أن يتطور الأمر إلى اصطدام بين السيارات، بعد تدخل سائق آخر لحمايتها.

مطاردة الواحات الجديدة

وقالت دنيا لـ القاهرة 24: كنا بنحسبه في الأول مش مصري، وكان مشغل أغاني خليجية بصوت عالي، وكل شوية يقرب مني، وأبعد عنه، وكل ما أبعد يقرب مني، والطريق كان واسع وفاضي، شديت بنزين عشان اتفاداه، لكنه كان بيجري ورايا وبيزنق عليا.

وتابعت: كان في واحد اسمه جون بعربية هو شغال في شركة نقل ذكي، شاف اللي بيحصل فحاول يبعده عننا، لأني كنت لوحدي أنا وأختي في العربية فتحرك في النص ما بين العربيتين، فالتاني خبطه من ضهر العربية، وجرحله العربية، وفقد السيطرة عليها، ووقفت في نص الطريق.

وأضافت: طلعت بسرعة الموبايل أصور قام خبط جون تاني، وخبط عربيتي أنا كمان، وعربية كمان كانت على الطريق وجري، وجون اتصاب وراح المستشفى بسبب الخبطة وعملنا المحضر باللي حصل.

وفي وقت سابق، قالت دنيا محمد في البوست الذي نشرته على حسابها الشخصي، إنها كانت توصل أختها للجامعة الساعة 9:30 صباحًا متجهة إلى عملها في الشيخ زايد، ولاحظت سيارة يقودها رجل ويضايقها ويحاول إيقافها.

وأضافت أنها شعرت بالخوف وحاولت الابتعاد عنه، لكنه واصل مضايقتها لعدة مرات.