ضربته بـ العكاز وقفلت الفصل عليه.. معلمة تعتدي على طالب بمدرسة في شبرا
نشرت ولية أمر طالب في مدرسة حافظ إبراهيم الرسمية للغات التابعة لإدارة شبرا التعليمية بمحافظة القاهرة، استغاثة بعد تعرض ابنها للضرب من معلمة داخل الفصل.
وقالت ولية الأمر في استغاثتها عبر موقع التواصل الاجتماعي فيس بوك: ليه مدرسة تعمل فى عيل صغير كده؟، تحبسه فى الفصل وتقفل الباب عليه بعد خروج زمايله من الفصل وتسد باب الفصل بالديسك وتنزل فيه ضرب بالعكاز اللي معاها وتكسره عليه؟.
ضربته بـ العكاز وقفلت الفصل عليه.. معلمة تعتدي على طالب بمدرسة في شبرا
وأضافت: سبب ضرب ابني ياسين إنه خبط فيها بكتفه غصب عنه وهو داخل ياخد مقلمته اللي نسيها، والولد فضل يصرخ ويقول لها أنا آسف وهو معملش حاجة، كل ذنبه إنه نسي مقلمته ورجع ياخدها وهي قاعدة فى الفصل خبط فيها بكتفه تقوم تهجم عليه.
وأوضحت: المدرسة قفلت باب الفصل وحطت ديسك علشان محدش يدخل وفضلت تلطش فيه بالعكاز وبايديها على جسمه ووشه وتتعدى عليه لغاية ما الولاد بتوع ثانوى وإعدادى سمعوا صريخه، ومدرسة ومدرس تانيين كسروا باب الفصل علشان ينجدوا ابني من تحت إيديها.
وقالت ولية الأمر: مدير المدرسة قالي معلش أصلها تعبانة نفسيا!.. لو تعبانة نفسيا تقعد في بيتها ابني كان ممكن يموت فى إيديها لو محدش لحقه.
وأضافت ولية الأمر: قلبى مقهور على ابني ومنظره وهو راجع مقهور وبيعيط ويقولى والله ماعملت لها حاجة دي كانت حتموتني، وابنى مش عاوز يرجع المدرسة ومدمر نفسيا.
واختتمت: أنا أخذت الإجراءات القانونية وعملت لها محضر عشان المدرسة دي تاخد جزاءها اللي تستحقه، وأنا أطالب وزارة التربية والتعليم ووزارة الداخلية والمجلس الأعلى لحقوق الطفل بالتحرك لرد حق ابني.
