بعد استجابة سينما زاوية.. المخرج محمود يحيى: عرض فيلمي غير عادل وما زلت مستمرًا في صيامي
أعلن المخرج محمود يحيى أنه لا يزال مستمرًا في إضرابه عن الطعام بعد رفض سينما الزاوية عرض فيلمه اختيار مريم، مشيرًا إلى أنه يطالب بمنح العمل فرصة عادلة مثل باقي الأفلام.
وظهر محمود يحيي في فيديو عبر حسابه بموقع التواصل الاجتماعي فيس بوك يرد من خلاله على بيان سينما الزاوية قائلًا: أنا وعدت نفسي من أول الأزمة إني مش هغلط ومش هتخطى حدود الأدب، ومن إمبارح بقول: حسبنا الله ونعم الوكيل، أنا مستغرب ليه في ناس مستكترين عليا النجاح بالرغم إنهم هياخدوا 50% وهيكسبوا أكتر مني، أنا والموزع هناخد 50% وهما هياخدوا 50%.
وتابع: أول ما قرأت بيان سينما الزاوية عرفت إن في حاجة بتتطبخ، ومفطرتش الحمد لله ولسه مكمل في صيامي، وأنا طالبت بعرض عادل لفيلمي، والعرض اللي هم بعتوه غير عادل تمامًا هم قالوا في البيان هنعرض الفيلم عرض واحد مش يوم كامل حتى ده عرض واحد، ومن غير داعي وياخدوا مني 50%، الأوفر الجديد عايزين يعرضوه 3 ليالي.
تصريحات محمود يحيى
وأضاف: فيلمي شارك في مهرجان، وتم اختياره كأفضل فيلم باختيار الجمهور، وبالرغم من كده باقي الأفلام اتعرضت 10 أسابيع وفيلمي لأ؟،.. هم عايزين يقتلوا فيلمي وفيه كمية أكاذيب وادعاءات عن الفيلم مش طبيعية.
واستكمل: هل باقي المنتجين دفعوا فلوس وأنا دفعت بنبوني؟.. أنا كنت بوفّر وبصرف 100 جنيه عشان أحوش للفيلم، بدل ما تخدوا الموضوع كـ تحدّي، حاولوا تخلّوا المعايير أوضح، ولازم يكون في معايير على كل المنتجين.
واختتم: إنتوا هتكسبوا أكتر مني حرام عليكم، أنا هكمل في اللي أنا فيه وهشوف سواء اللي توكل على الله هيكسب، ولا اللي بيسلّطوا عليّ لجان على الفيس بوك عشان يخسّروني، أنا مش هقع ومش هوقف دلوقتي، أنا بخاطب ضميركم، ومينفعش تعملوا كده مع واحد لسه بادئ طريقه، وقريبًا هقوم بالتصعيد.
