حمادة عبد اللطيف: فكرة إن الأهلي بيكسب بالحكام فكر فاسد.. ولازم الزمالك يراجع نفسه
انتقد حمادة عبد اللطيف، نجم الزمالك السابق، حديث بعض جماهير ومسؤولي القلعة البيضاء عن أن الأهلي يحقق بطولاته بمساعدة الحكام، مؤكدًا أن هذا فكر فاسد يجب التخلص منه.
تصريحات حمادة عبد اللطيف
وقال حمادة عبد اللطيف، عبر قناته على فيسبوك: من أول ما دخلت الزمالك وأنا 15 سنة بسمع الكلام بتاع الأهلي بيكسب بالحكام، أول ما دخلت قطاع الناشئين والمدرب بتاعنا وبعض المسئولين واحنا رايحين الماتش قالوا خلوا بالكوا من الحكام هيجاملوا الأهلي ويكسبوه الماتش، ولما لعبنا والفريقين كانوا كويسين وكنا موفقين وكسبنا الأهلي الحكم كان متميز جدًا ومحسيتش بأي ظلم لنادي الزمالك، الموضوع اتكرر في ماتشات كتير ولما نبقى وحشين ونخسر يقولوا الحكام جاملوا الأهلي، طب ما انت كسبت قبل كدة، مقالوش إنه جاملك ليه؟.
وأضاف: الموضوع بقى متكرر وسخيف، الأهلي معاه 45 دوري ويتقال أصل الأهلي بيكسب بالحكام، هتكسب 45 بطولة دوري بالحكام؟ يعني هو الأهلي مبيلعبش خالص ومعندهمش نجوم ولعيبة مميزة؟ كلام سخيف ومبيعجبنيش، الأهلي 39 بطولة كأس مصر والناس المغيبة مش عاوزين يعترفوا بالحقيقة، طب ما الزمالك 29 بطولة كأس وقريب من الأهلي، ليه منقولش إن الزمالك كسبهم بالحكام؟ أنا بحب الكلام الموزون دايمًا بالعقل مش بالعاطفة ولا الانتماء.. الأهلي كسبان 12 بطولة إفريقيا واحنا ماخدناش إفريقيا من 23 سنة وده مخليني حزين، ممكن تتجامل مرة أو مرتين خصوصًا الأهلي أو الزمالك لما ليهم من شعبية طاغية، لكن هتتجامل في كل البطولات دي؟ أنا بتكلم في الحق ومبخافش غير من اللي خالقني، مبحبش موضوع المظلومية اللي عايش فيه بعض مسئولين وجماهير الزمالك.. لما كنت كويس خدت إفريقيا والدوري ومحدش ظلمك ولا ضايقك، فيه ناس بتغير الحقيقة عشان مش ناجحين ولا بيكسبوا
وأوضح حمادة عبد اللطيف نجم الزمالك السابق: الأهلي هو رقم 1 محليًا وعربيًا وإفريقيًا، وساعات بيقع زي أي فريق، طيب لو الأهلي بيكسب بالحكام، ليه خسر من مودرن وبيراميدز والمحلة وإنبي؟ ليه الحكام مساعدوهوش؟ الأهلي لعب ضد الزمالك والحكم مجاملش الأهلي ولا ظلم الزمالك، الأهلي كان أفضل وكسب بالملعب.
وأشار: أنت عايز تلغي تاريخ وبطولات ونجوم الأهلي عشان أنت بليد عشان مش عارف تكسب وتاخد بطولات.. تعال نصلح من أخطاء النادي ونغير المفهوم الفكري الفاسد اللي هو الأهلي بيكسب على الحكام.. مش عارف أكسب بطولات أرمي البلاء على الأهلي؟.
وكشف حمادة عبد اللطيف عن واقعة مع الراحل حسن حلمي زامورا: مرة خسرنا ماتش ناشئين والمدرب قال إن الحكم السبب، الكابتن زامورا خصم من المدرب وقاله الفريق وحش، ولو كرر الكلام ده هيمشي، دي العقلية الصح.
واختتم: مينفعش نلغي تاريخ وبطولات ونجوم الأهلي بكلمة (الأهلي بيكسب بالحكام)، بدل ما نرمي بلاك على غيرنا، لازم ندور على أخطائنا ونشتغل عشان نرجع للمنافسة الحقيقية، فكرة المظلومية مش هتجيب بطولات.
