أيمن أشرف: كولر غير واضح ومعندوش إنسانيات.. وأي مدرب كان يكسب إفريقيا
تحدث أيمن أشرف مدافع الأهلي ومنتخب مصر السابق، عن فترة تدربه تحت قيادة السويسري مارسيل كولر المدير الفني الأسبق للأحمر.
أبرز تصريحات أيمن أشرف عن كولر
وقال أيمن أشرف في تصريحات إعلامية: كولر مدرب منظم في الملعب ويجيد التدريبات البدنية وإنه يوقف اللاعبين على رجلهم، لكن فنيًا هو بعيد جدًا، لا يمتلك فنيات جديدة يقدمها، وكان فيه حاجات تكتيكية ناقصة في الملعب وقتها، وكولر مش زي موسيماني أو فايلر اللي كان عندهم حاجات فنية جامدة.
وعن تتويج السويسري بدوري أبطال إفريقيا، قال: أي مدرب معدي من جنب الأهلي هياخد إفريقيا، في أول سنة لكولر كنا برة البطولة لولا ضربة جزاء أطهر الطاهر، يعني ضربة جزاء هي اللي رجعتنا البطولة، كسبناها بشغل 10% جهاز فني و90% لعيبة خاصة إننا كقادة كنا بنلم اللاعبين، بالإضافة إن موسيماني كسب لقبين دوري أبطال إفريقيا.
وشدد: كولر كان عنده مشكلة في التعامل مع اللاعبين، طول ما معاه في الملعب أنت حبيبه وابنه لحد ما تتصاب، يعني علي معلول أول ما اتصاب ولا كأنه شايفه ولا بيطمن عليه، ولا أي حاجة ودي مشكلة.
وأوضح: علي معلول كان بيكسبه ولاعب جامد، فعلى الأقل اطمن عليه، خلي في حاجة إنسانية هو كان عنده مشكلة إنه راجل مش واضح ومعندوش إنسانيات، بس فايلر كان في وضوح على الأقل.
واختتم أيمن أشرف: لو رجع بيا الزمن كنت هتعامل بدبلوماسية أكتر مع مارسيل كولر في بعض الأوقات، وكان ممكن أرجع ألعب معاه، بس جات لي فترة كنت في صدام شوية وكان باين في ملامح وشي.
