ماجد الكدواني: زمان حياتي كانت صاخبة وشديد العصبية.. واتغيرت لما شبعت من اللي شفته
كشف الفنان ماجد الكدواني، عن التغيرات التي طرأت على شخصيته على مدار السنوات الماضية، بجانب الحديث عن العائلة والقرارات الحاسمة.
وقال ماجد الكدواني، في لقائه مع الإعلامية لميس الحديدي في برنامجها الصورة: زمان كنت شخصية تانية وكانت حياة صاخبة جدًا، وكنت عصبي وسريع الغضب الشديد على أقل حاجة، وكنت أحيانًا ممكن أكسر حاجات حواليا، وكان ضغط أعصاب وقلة خبرة في الحياة، واللي غيرني أني شبعت من اللي شفته وهل أنا موافق على هذه الحياة وبهري في نفسي وبس، ولما شفت الحياة الأخرى قلت تعالى نغير.
وتابع ماجد الكدواني: لما أنا اتغيرت اللي حواليا اتغيروا، وعرفت أني مش سعيد ومش مرتاح بسبب إيه، ولما غيرت نفسي ارتاحت واللي حواليا ارتاحوا، ودي كانت نصيحة واحد قد أبويا.
وواصل: فكرة العائلة حلوة أوي، وأحب أعيش في سلام طول الوقت والحسم بالراحة وناخد رأي بعض ونشوف إيه الصح اللي يتعمل، وطبعًا الأب بيحتاج في بعض الوقت يكون حاسم جدًا، لما ساندرا بنتي تعبت من المدرسة وقلت هتتنقل يعني هتتنقل، وهي كانت ميتة من العياط علشان هتسيب أصحابها، ولكن قلتلها ده للخير ولازم تتنقلي والحمد لله طلعت للخير، فيه مواقف في الحياة لازم تكون حاسمة.
