أبرز تصريحات محمد ثروت التلفزيونية: تعلمت من عبد الوهاب احترام الجمهور.. ولا أمانع في التعاون مع ويجز وتوو ليت
أكد المطرب الكبير محمد ثروت أن الموسيقار الراحل محمد عبد الوهاب كان له تأثير بالغ في مشواره الفني والإنساني، مشيرًا إلى أنه تعلم منه أن احترام الجمهور هو أساس النجاح الحقيقي لأي فنان، وأن الموهبة مسؤولية يجب توظيفها بما يليق بالمستمعين والمشاهدين.
وبجانب هذا أكد الفنان محمد ثروت أنه مستمع جيد لجميع الألوان الموسيقية، ولا يمانع التعاون مع الأجيال الجديدة، منهم ويجز وتوو ليت، حيث أشار إلى أنه في البداية كان يقدم ديو مع كبار النجوم الذين ساندوه في مشواره الفني، لذلك لا بد أن يقدم النجوم الكبار الدعم للشباب.. ونستعرض لكم أبرز تصريحات محمد ثروت التلفزيونية.
- أستاذ عبد الوهاب عاش قرن من الزمان كان كله احترام، حرص على مستمعيه ومشاهديه، اختيار موثق لأعماله.
- اتعلمت منه إن الجمهور لابد أن يحترم، والإنسان إذا كان ربنا مديله موهبة، فمش المفروض إنه يؤذي الناس بهذه الموهبة.
- تحريت حاجات كتير جدًا منها حرصي على العمل من حيث الكلام واللحن والأداء وطريقة التسجيل.
- أي حاجة بعملها لازم أركز لها وبأحس إن أنا بأغني لأول مرة، وأنا طالع على المسرح رغم سنين العمر دي كلها.
ـ كل مرحلة في العمر لها عوامل نجاحها ولها حالتها عند الإنسان.
ـ فأنا لما لما طلعت بلدي أو لما غنّينا الأغاني الوطنية دي في 6 أكتوبر حسيت إن الناس بتستدعي فترة 40 سنة من حياتي.
ـ الطفل اللي كان عنده 5 سنين بقى عنده 45 سنة.. الشاب اللي كان عنده 20 سنة عنده 60 سنة النهاردة، كل الناس دي بتفتكر ذكرياتها.
ـ أنا ما عنديش أي مانع لمشاركة أي فنان وبرحب بالألوان اللي أقدر أعبر عنها اللي أقدر أقولها.
ـ عملت ده قبل كده زمان وأنا لسه طالع وسميرة سعيد طالعة عملنا دويوهات لبليغ حمدي.
ـ عملت تريو مع علي الحجار ومدحت صالح "شبك يا مصر إيديك شبك".
- أرحب بديو مع ويجوز وتووليت.. لأني بسمع كل الألوان الفنية.
- ما عنديش أي مانع لمشاركة أي فنان.
ـ أنا ما عنديش تحفظ على حاجة ومش ضد أي لون من ألوان الإبداع ولا عندي وجهة نظر في مين بيعمل إيه.
