شغلوا بابا فين في حفل دار أيتام.. فيديو لحسام داغر ومحمد ممدوح يغضب خريجي دور الرعاية: إحنا مش مادة للضحك
أثار مقطع فيديو متداول من حلقة بودكاست “شقة التعاون” للفنانين محمد ممدوح وحسام داغر، حالة من الجدل على مواقع التواصل الاجتماعي، بعد حديثهما ضاحكين عن مواقف وقعت داخل دار للأيتام، تضمن أحدها الإشارة إلى «سرقة واي فاي» من دار الأورمان للأيتام، وآخر عن تشغيل أغنية «بابا فين» للأطفال، المقطع الذي بدا عفويًا أثار استياء عدد من خريجي دور الرعاية، الذين اعتبروا ما ورد فيه «سخرية مؤلمة» من فئة يجب احترامها لا التنكيت عليها.
وظهر الفنان حسام داغر في المقطع الفيديو، وهو يسرد ضاحكًا موقف حدث معه حول سرقة الإنترنت من دار الأورمان للأيتام، مردفًا: كنا سارقين نت من دار الأورمان اللي جنبنا، وقاطعه الفنان محمد ممدوح ضاحكًا: دار الأورمان بتاعة اليتامى، مش لازم نقول أدام الناس يعني، ليرد عليه داغر: هما اللي كان عندهم واي فاي وكانوا لازقين فينا وواحد صاحبي كان شغال IT لقيته قاعد على النت عادي قولتله جايب نت منين قالي هكرت الواي فاي بتاع دار الأورمان وفاتحينه وقاعدين عليه وكان سريع وتحفة.. كلنا مال اليتيم.
https://www.instagram.com/reel/DPeppwKDFOG/?igsh=NmN4bW9kdjIwbjl6 وتابع داغر ساردًا موقف آخر عند زيارته لدار الأيتام وفوجئ بتشغيل أغنية بابا فين للأطفال، وسط نوبة من الضحك منه ومن الفنان محمد ممدوح: كنا بننزل نلعب معاهم وفاكر أول مرة عاملين حفلة اليتيم دي وأنا بحبهم بجد يعني، فنزلت لقيتهم مشغلين أغنية بابا فين، وأنا مش قادر أصدق الجبروت.
فيديو لحسام داغر ومحمد ممدوح يغضب خريجي دور الرعاية
«الأيتام مش مادة للضحك»، يقول نور شعبان أحد خريجي دور الرعاية والملقب بسفير التضامن الاجتماعي، خلال حديثه مع القاهرة 24، ويرى أن المقطع مؤلم لفئة كبيرة من أبناء دور رعاية الأيتام؛ معللًا ذلك بأنه تناول موضوعًا لا يجوز التعامل معه بخفة أو سخرية، كما أن الكلمة والمشهد من الممكن أن يبنوا وأيضًا يهدوا، حسب قوله.
وأردف نور شعبان: «أكن كل الاحترام والتقدير للفنان محمد ممدوح وأقدر مشواره الفني وأعماله اللي لامست قلوب الناس، ولكن الأيتام مش مادة للضحك، دول شباب عندهم أحلام وتحديات زي أي حد، ويمكن أكتر.. الفن الحقيقي دوره يرفع الوعي ويكسر الصور النمطية، مش يرسخها، والفنان حسام داغر يقول اكلنا مال اليتيم ضاحكا وكان اكل مال اليتيم مستباح طالما هنزور اليتيم ثم التريقة على اغنية بابا فين، كام طفل يتيم ممكن يتعرض للتنمر من هذا الفعل ؟!، أتمنى من نجومنا الكبار دائمًا إنهم يفضلوا قدوة حقيقية في تقديم فن يحترم كل الفئات».
في منشور لها عبر صفحتها الشخصية بموقع التواصل الاجتماعي، اتفقت في الرأي نهلة النمر سفيرة المراقبة المجتمعية على دور الرعاية وعضو لجنة أبناء مصر وإحدى خريجي دور الرعاية، مع نور شعبان، ورأت فيه سخرية وإهانة مغلفة من الفنان بجملة «بس أنا بحب الأطفال دي»، قائلة: «دا فيديو لاثنين من الفنانين قاعدين قعدة صحاب بيحكوا مواقف تضحك، لكن للأسف الموقف بالنسبالي وبالنسبة لكتير زيي مفيهوش أي ذرة ضحك بالعكس حسيت أن في سخرية وإهانة مغلفة بجملة - بس أنا بحب الأطفال دي».
وتابعت: الضحك على أطفال دار الايتام على الأغنية اللي كانوا مشغلينها وبيفرحوا عليها -بابا فين- حقيقي لقطة متصورتش تطلع أبدا منهم، حتى مفيش أي استنكار لأي حاجة غلط.. مسلسل خلي بالك من زيزي كان عبقري إزاي نفهم ونقدر مشكلة عند حد وإزاي بيعاني منها ومن عدم فهم الناس لها، عشان كده توقعت إنك تكون مقدر إن من جمهورك شباب وأطفال ايتام حقيقي هيتأذوا من فيديو زي ده
الفن مش بس رسالة لكنه كمان.. تعبير عن فئات المجتمع المختلفة ومشاعرهم اللي منهم.. الأيتام».
وقالت فتاة أخرى تدعى فاتن وليد، إحدى خريجي دور الرعاية، في منشور لها تعليقًا على مقطع الفيديو: حاجة في قمة الوجع..عمري ما كنت أتخيل إن فيديو بسيط يخليني أكره ممثل كنت بحبه أوي.. لما يتحول وجع الناس لهزار وسخرية، يبقى إحنا وصلنا لمرحلة مؤلمة من الجهل والاستعلاء، وبعدين نستغرب ليه المفاهيم عن حياتنا في المجتمع بقت مشوهة بالشكل ده».
