فرد الأمن ضحية مشاجرة عصام صاصا في التحقيقات: مدير أعمال المطرب جاب ناس ضربوني بأسلحة بيضاء| خاص
كشفت التحقيقات في القضية رقم 11501 جنح قسم دار السلام والمتهم فيها مطرب المهرجانات عصام صاصا ومدير أعماله وآخرين بوقوع مشاجرة داخل ملهى ليلي بالمعادي مع عدد من أفراد أمن شركة حراسات خاصة بسبب التفتيش مما أسفر عن إصابة عدة أشخاص.
فرد الأمن ضحية مشاجرة عصام صاصا بالتحقيقات
وينفرد القاهرة 24 بنشر نص التحقيقات واعترافات المتهمين في القضية حيث باستجواب فرد أمن بشركة حراسات خاصة المسؤول عن تأمين الملهي الليلي بالمعادي كمجني عليه أجاب بالآتي.
س - ما تفصيلات حدوث إصابتك؟
اللي حصل إني فرد أمن في شركة الهضبة الخاصة بتأمين المركب السياحي نايل بوينت وكان المغني اللي اسمه عصام صاصا داخل هو ومراته وكان معاه ناس تانيين فجينا نفتشهم عشان الجهاز كان مصفر فمرضيوش وبعدها حصلت مشادة كلامية فيما بينا وبعد كده الدنيا اتلمت.
وأضاف فرد الأمن بمشاجرة عصام صاصا: وبعد كده بنص ساعة واحد معاهم اسمه معاذ جاب ناس معاه وراحوا ضربوني وكان معاهم أسلحة بيضاء ونزفت دم كثير واخدت الموتوسيكل بتاعي ورحت على مستشفى قصر العيني وأنا في الطريق كان فيه عربية بي إم إكس معدية وأنا بحاول أمشى على الطريق الموتوسيكل فلت مني وخبط فيها علشان كنت بنزف ومش عارف أسوق وبعدها جه واحد صاحبي ركبني تاكسي ووداني على مستشفى قصر العيني وخيطت هناك 20 غرزة في راسي وغرزتين في كتفي وفيه إصابة في أيدي لسه متخيطتش وبعد كده الضابط اللي كان معايا هناك جابني على النيابة هنا وده كل اللي حصل.
س: متى وأين حدث ذلك؟
ج: الكلام ده حصل يوم 7 - 10- 2025 الساعة 6 صباحًا في كورنيش النيل أمام مستشفى السلام الدولي.
س: ما سبب ومناسبة وجودك بالزمان والمكان سالفي الذكر؟
ج: أنا كنت شغال هناك.
س: من محدث إصابتك تحديدًا؟
ج: معاذ و. ل وكان معاه أربعة كمان أنا معرفهمش.
س: وكيف قام سالف الذكر بإحداثها؟
ج: هو معاذ ضربني بـ سيلف ديفنس في عيني وبعدها ضربني بكذلك على راسي وعلى دراعي اليمين وبمطواة على كفي اليمين.
س: وما هي الأداة المستخدمة في إحداث إصابتك تحديدًا؟
ج: كذلك ومطواة.
س: ومن أين استحصل القائم بإحداث إصابتك على تلك الأداة ؟
ج: أنا معرفش.
س: كم عدد الضربات التي كالها لك المشكو في حقه؟
ج: هو ضربني 6 ضربات.
س: وأين استقرت تلك الضربات تحديدًا؟
ج: في راسي وفي كتفي وفي أيدي.
س: وما هو قصده تحديدًا من أحداث تلك الإصابة؟
ج: هو قصده يضربني.
س: ما هي حالتك الصحية الآن؟
ج: أنا لسه تعبان.
س: هل الدراجة البخارية أرقام ا وق 9129 قيادتك ملكك؟
ج: لا دي بتاعت واحد صاحبي.
س: هل تتهم شخصا بإحداث تلفيات بها؟
ج: لا اللي حصل إني وأنا ماشي عشان كنت تعبان اختل توازني خلال قيادتها فسقطت من عليها فاصطدمت بسيارة بيضاء اللون كانت ماشية في الشارع.
س: هل لديك أقوال أخرى؟
ج: لا
