بحجة تنظيم حفل تخرج.. خريجات الدراسات الإنسانية بالأزهر يحررن محاضر ضد أدمن جروب الدفعة لاستيلائها على 288 ألف جنيه
حررت عدد من خريجات دفعة 2025 بكلية الدراسات الإنسانية بجامعة الأزهر، محاضر بقسم ثان مدينة نصر من بينها محضر رقم 5906 إداري ثان مدينة نصر، بعد تعرضهن لواقعة نصب من قبل إحدى زميلاتها أدمن جروب الدفعة، استولت على نحو 288 ألف جنيه، كانت قد جمعتها منهن بحجة تنظيم حفل تخرج الدفعة، قبل أن تدعي أن المبلغ سرق منها وتختفي عن الأنظار.
خريجات الدراسات الإنسانية بجامعة الأزهر يحررون محاضر ضد أدمن الدفعة
وقالت إحدى الطالبات المتضررات، لـ«القاهرة 24»: «إحنا دفعة الدراسات الإنسانية، وكان المفروض نعمل حفل التخرج يوم الخميس اللي فات 9 أكتوبر، والبنت دي كانت معانا في الدفعة ومسؤولة عن جمع الفلوس الخاصة بالحفل، لأنها قالت إنها هتتعامل مع شركة التنظيم».
وأضافت: «كل البنات حولوا لها المبالغ، والعدد كان حوالي 300 بنت، والمفروض إن المبلغ الإجمالي كان يقرب من 300 ألف جنيه، والشركة كانت طالبة باقي المبلغ أول الأسبوع، علشان تجهز القاعة والحفل، لكن لما كلمناها نحول باقي الفلوس قالت إن المبلغ اتسرق ومرة تقول وقع مني في الميكروباص».
وتابعت: «سألناها فين إثبات السرقة أو محضر الشرطة، قالت إن والدتها عملت محضر في قسم الأربعين بالسويس، لكن لما راجعنا القسم اكتشفنا إن مفيش أي محضر باسمها».
وأكدت أن المتضررات حررن بلاغات رسمية بالقاهرة، مردفة: «أكثر من 20 بنت راحوا قسم ثان مدينة نصر، وعملنا محضر بالواقعة، وسلمنا صورة العقد اللي موقعاه بعض البنات مع شركة التنظيم».
وأوضحت أن الواقعة لم تتسبب فقط في ضياع المبلغ المالي وإلغاء الحفل، لكنها تسببت في أزمة نفسية للبعض ومشكلة قانونية لعدد من الطالبات اللاتي وقعن عقودًا رسمية مع شركة التنظيم من ضمن الشروط في حالة الإخلال بدفع مبلغ 150 ألف جنيه، ما يهدد مستقبلهن بالحبس قبل بدء حياتهن العملية.
واختتمت الطالبة: إحنا عايزين حقنا، واللي حصل ده ضيع علينا حلم كنا بنستناه من 4 سنين، ومش مقبول إن زميلة لينا تستغل ثقتنا بالشكل ده».
