محمد سامي عن إهدائه سيارة رولز رويس لـ زوجته مي عمر: أنا مش شغال موظف ودخلي مش محدود
علق المخرج محمد سامي على إهدائه سيارة رولز رويس لـ زوجته الفنانة مي عمر، في عيد ميلادها، مشيرًا إلى أنها لا تطلب كثيرًا وهذا يجعله يريد أن يقدم لها كل شيء.
وقال محمد سامي خلال ندوته بـ القاهرة 24: أولا مابعتش الساعة اللي هي جابتهالي أنا كنت بهزر، ومعتقدش إني بخاف من الحسد لأن ناس كتير عندها حاجات أكتر محصلهاش حاجة، وفي ناس كتير في العالم تتحسد أكتر.
وعن السيارة الفارهة التي أهداها لـ مي عمر، قال محمد سامي: مش غريب إني بعد كل السنين والشغل ده إني أقدر أجيب العربية دي، أنا مش بشتغل موظف عشان يكون دخلي محدود، أنا بشتغل شغلانة فنية بتجيب فلوس كتير وربنا يكرم الناس كلها.
وأضاف محمد سامي: مي شخص مش مادي خالص ومش بتحب الدهب ومش بتقولي اشتريلي كذا، ولو جبتلها شنطة بتقولي ليه جبتلي ما أنا عندي، وهي مرة كانت بتصور مسلسل بعربية شبه دي، وعجبتها فقولت هجيبها وده قليل عليها.
محمد سامي يفاجئ مي عمر في عيد ميلادها
وخلال الأيام الماضية، فاجأ المخرج محمد سامي زوجته الفنانة مي عمر بهدية فارهة بمناسبة عيد ميلادها، حيث أهداها سيارة رولز رويس، وشاركت مي عمر صورة لها بجانب السيارة، وعلقت بعبارات مليئة بالحب والامتنان: شكرا يا حبيبي على هدية عيد ميلادي الجميلة.. كل سنة وإنت سندي وفرحتي.
