اعترافات الراقصة ليندا في التحقيقات: أنا ملتزمة ومش قصدي الإغراء ولا هدفي العري | خاص
كشفت التحقيقات في واقعة القبض على الراقصة ليندا بتهمة نشر الفسق والفجور والظهور بملابس فاضحة، ونشر فيديوهات خادشة للحياء العام، وممارسة الرذيلة مع الرجال دون تمييز مقابل مبالغ مالية، اعترافات المتهمة، وكيفية نشأتها وامتهانها الرقص، وتفاصيل القبض عليها.
تحقيقات قضية الراقصة ليندا
وحصل القاهرة 24 على التحقيقات في قضية الراقصة ليندا وجاءت كالآتي:
نشأة الراقصة ليندا وكيف اتجهت للرقص
أنا اسمي سهيلة. ط 32 سنة أعمل راقصة شرقية، وأنا اتولدت في مصر ومكملتش دراستي، سبت المدرسة من وأنا عندي 14 سنة وسافرت إيطاليا وأنا عندي 18 سنة، درست هناك عن الأزياء واتجوزت وأنا عندي 19 سنة، ورجعت عيشت في مصر وأنا في سن 23 سنة، وقررت أعيش في مصر أنا وجوزي علشان قررت أشتغل هنا، وأنا بشتغل راقصة شرقية من حوالي 8 سنوات، وأنا لما رجعت مصر عجبني موضوع الرقص وأنا بحب الفن، فقررت إني ألتحق بالمجال ده، وسجلت في نقابة المهن التمثيلية والرقابة العامة للمصنفات الفنية، علشان أقدر أمارس المهنة في أي مكان، لأن الأماكن اللي برقص فيها بتكون مرخصة فيشترط أني أكون مسجلة في الرقابة العامة للمصنفات.
أجرها في الحفلات والأفراح
وأضافت الراقصة ليندا في التحقيقات: أنا ليا مدير أعمالي، والمكان اللي بيبقي عايز يتعاقد معايا بيكلم مدير أعمالي وبيتم التنسيق على الميعاد والراتب وبروح اشتغل وقتها، الأمر بيختلف، أنا أول ما اشتغلت كنت باخد 15 ألف جنيه في الليلة ودلوقتي سعر الحفلة بيبقى 30 ألف جنيه والفرح 80 ألف جنيه، وباخدهم كاش من المكان اللي بشتغل فيه.
لحظة القبض على الراقصة ليندا
وعن واقعة القبض عليها قالت: اللي حصل إن أنا بتاريخ 22 يونيو 2025 كنت في مطار القاهرة علشان مسافرة ومتجهة لدبي ولقيتهم واقفوني في المطار وبلغوني إني ممنوعة من السفر، ومكنتش عارفة أنا ممنوعة ليه، وفضلت هناك لحد ما جالي اتنين ضباط وقالولي إنهم من مباحث الآداب وإني مطلوب القبض عليا.
اعترافات الراقصة ليندا
وأضافت الراقصة ليندا في التحقيقات: لما سألتهم ليه قالولي علشان فيه فيديوهات منتشرة على النت ليا وإن الفيديوهات دي عاملة مشاكل علشان مخالفة للقانون، قولتلهم إن دي مش صفحتي اللي منزلة الفيديوهات دي، وكمان فيه فيديوهات قديمة من حوالي 5 سنين وأكثر، ومش أنا اللي ناشراها وإني لما بخرج أرقص ببقى ملتزمة بضوابط المكان اللي برقص فيه، لأن لو خالفت الضوابط بتاعت المصنفات بدفع غرامة وممكن يحصل مشاكل للمكان اللي برقص فيه، فعلشان كده ببقى ملتزمة بضوابط المكان، وفضلوا مقعدني لحد ما عرضوني على النيابة.
وعن كيفية نشر الفيديوهات أجابت ليندا: مش أنا اللي بنزلها على النت، فيه صفحات كثير معمولة باسمي هي اللي بتنتشر الفيديوهات دي وكل الفيديوهات اللي أنا بنزلها عندي على صفحتي الموثقة، بتبقى فيديوهات رقص عادية من داخل فندق وبيبقى لبسي فيها مطابق للمصنفات وللشروط.
