تغريد فهمي: اللي بيعتزل الفن شخص عاجز.. ولازم نرجع للأم قيمتها في الدراما
أعربت الفنانة تغريد فهمي عن استيائها الشديد من تجاهل دور الأب والأم في الأعمال الفنية، مشيرة إلى أنهم من عناصر أساسية في الحياة الطبيعية، بجانب حديثها عن رأيها في اعتزال الفنانين لـ الفن.
تغريد فهمي: لازم نرجّع للأم قيمتها في الدراما
وقالت تغريد فهمي في تصريحاتها لـ القاهرة 24: بقينا نحس إن الكاتب بقى يهتم بالشباب أكتر من الفنانين الكبار، والأب والأم اللي كانوا دايمًا عناصر أساسية في الدراما وفي الحياة الطبيعية، دلوقتي بقوا ضيوف شرف، وده شيء مش كويس.
وأردفت: أنا عملت دور أم لكل الفنانين تقريبًا، وكان الدور دايمًا أساسي ومؤثر، لكن دلوقتي الأدوار دي تقلصت، وده يرجع للكاتب اللي مش بيهتم بدور الأم، رغم إن في الحقيقة الأم هي الأساس، ليه نقلص دورها في الأعمال الفنية؟ لازم نرجّع للأم قيمتها في الدراما زي زمان.
أما عن رأيها في اعتزال بعض الفنانين مجال الفن قالت تغريد: اللي بيعتزل الفن شخص عاجز لأنه فقد الثقة في ربنا، لكن الحقيقة إن الفنان لازم يكون صبور، لأن ربنا بيدّي كل واحد على قد تعبه، وأنا عمري ما تخليت عن حاجة وقلت مش هعملها، دايمًا مؤمنة إن ربنا بيخبّي الأحسن، وممكن ييجي عمل يعوضني عن كل اللي فات، وأوقات بيكون عندي أكتر من عمل في نفس الوقت.
آخر أعمال الفنانة تغريد فهمي
تعد آخر أعمال تغريد فهمي مشاركتها في مسلسل عتبات البهجة والذي دارت أحداثه في إطار درامي حول وكيل وزارة سابق بعد توليه مسؤولية تربية حفيديه اليتيمين عمر وجميلة، يجد وكيل الوزارة السابق بهجت الأنصاري نفسه يواجه سلسلة من المصاعب في سبيل توفير احتياجاتهما وإبعادهما عن المشاكل، بينما يحاول البحث عن السعادة التي تبدو أنها بعيدة المنال.
