كريم نيدفيد عن انتقال رمضان صبحي إلى بيراميدز: اتضايقت جدًا.. ورفضت أرد على رسالته الوداعية
تحدث كريم نيدفيد، لاعب النادي الأهلي، عن طبيعة علاقته بزميليه السابقين رمضان صبحي وناصر ماهر.
وقال نيدفيد في تصريحات صحفية: العلاقة بيني وبين رمضان أو ناصر مش موضوع كبير، يعني ما فيش تواصل على التليفون أو حاجة، لكن لما بنتقابل بنسلم على بعض ونتكلم ونتطمن، وخلاص.. العلاقة مش صداقة قوية، لكن برضه ما فيش كره، العلاقة عادية جدًا.
وأضاف كريم نيدفيد: كنت أنا ورمضان مع بعض في كل المنتخبات؛ الناشئين والشباب والأولمبي، فكانت علاقتي بيه أقوى شوية من ناصر.. بعد احتراف رمضان العلاقة قلت، لكن طول ما فيه تعامل بتكون العلاقة كويسة، ولما التعامل بيقل ما فيش علاقة، وده طبيعي.. بس ما فيش أي مشكلة بينا.
وعن انتقال رمضان صبحي إلى بيراميدز قال نيدفيد: موضوع بيراميدز كان قرار هو شايفه صح من وجهة نظره، وهو اللي يتحمل نتيجته.. شايف العرض مناسب ليه، وده حقه في النهاية.
وأردف كريم نيدفيد: رمضان جوه الأهلي كان الناس بتحترمه جدًا وبتقدره، وكان واخد مكانة كبيرة وهو صغير، فقرار رحيله ماكانش سهل علينا إحنا ولاد النادي.. القرار ممكن يبقى عادي لأي لاعب، لكن بالنسبة لينا إحنا اللي اتربينا في الأهلي، ما كانش منطقي، خصوصًا في السن والتوقيت ده.
وأكمل نيدفيد: ما اتكلمتش مع حد وقتها، بس كنت متضايق.. لما بيراميدز أعلن رسميًا انتقال رمضان، كتب رسالة وداع على جروبنا في الواتس آب، وأنا ما قدرتش أرد، لأن الموقف كان صعب عليّ ومؤثر جدًا.. الأهلي كان مقدّره جدًا، وكان بيعمله كل حاجة ممكن تتعمل، فحسّيت إن القرار ده صعب علينا كلنا.. رمضان وقتها كان أغلى إعارة، فالموضوع كان كبير.
واختتم نيدفيد تصريحاته قائلًا: قابلت رمضان مؤخرًا في النادي، وسلمنا على بعض عادي جدًا، ما فيش أي حاجة.. كل واحد دلوقتي في طريقه، وربنا يوفق الجميع.
