مدحت شلبي: اعتذار حسام حسن عن مواجهة البرازيل خطوة غير موفقة.. والمنتخبات التي واجهناها لا تقيس مستوى المنتخب
علّق الإعلامي مدحت شلبي على أداء منتخب مصر تحت قيادة المدير الفني حسام حسن، مشيرًا إلى أن تقييم المنتخب يجب أن يكون وفقًا لمستوى المنافسين، كما وجّه انتقادات لقرار الجهاز الفني بعدم خوض مواجهة ودية أمام البرازيل.
مدحت شلبي: اعتذار حسام حسن عن مواجهة البرازيل خطوة غير موفقة
وقال شلبي خلال تصريحات تليفزيونية: أحيانًا كلامي بيتفهم بشكل مختلف، وده حصل قبل كده، لكني مش هتكلم عن اللي فات، مش ذنب حسام حسن إن المنتخبات اللي لعب ضدها مكنتش على نفس مستوى منتخب مصر، لكن الأداء الفني مكنش في مستوى التطلعات، ويمكن كمان اللعيبة كانت في حالة استرخاء ذهني.
وحرص شلبي على تهنئة المنتخب السعودي بعد تأهله لكأس العالم قائلًا: قبل ما نبارك لمنتخب مصر، لازم نقول مليون مبروك للمنتخب السعودي الشقيق على التأهل إلى كأس العالم، هذا المنتخب العظيم.
وانتقد شلبي ضعف المنافسة في المباريات الأخيرة قائلًا: مفيش أي تقارب بين منتخب مصر والمنتخبات اللي واجهناها، وده بيصعّب عملية التقييم.. اللوم هنا مش على الأداء فقط، لكن كمان على اعتذار حسام حسن عن خوض مباراة ودية أمام منتخب البرازيل، كانت فرصة حقيقية لقياس مستوى اللاعبين.
وأضاف موجهًا حديثه لحسام حسن: أتفهم إنك كنت قلقان من الخسارة بنتيجة كبيرة قد تضر مشوارك، لكن اللعب أمام الكبار مهم.. وبقولك العب ومتخافش، مش هنوصل لمستوى عالي وإحنا بنلعب مع فرق زي جيبوتي وغيرها، في أمم إفريقيا وكأس العالم هتقابل أباطرة، ولازم تكون جاهز من دلوقتي.
