عمرو الليثي: لا تجعل حياتك كلها شكوى.. واحمد ربنا على النعم اللي عندك
وجّه الإعلامي الدكتور عمرو الليثي رسالة مؤثرة لجمهور برنامجه أبواب الخير، تناول فيها أهمية شكر النعمة، والرضا، وعدم الاستغراق في الشكوى، مؤكدًا أن الكثير من تفاصيل حياتنا اليومية التي نعتبرها روتينية، هي في الحقيقة حلم يتمناه آخرون.
وقال الليثي في بداية حديثه: ربنا يرزقك ويعطيك صحة وأسرة وعافية، وييجي حد يسألك: عامل إيه؟ تقول له: عادي.. مفيش جديد.. روتين وحياة مملة، حضرتك مش عارف إن روتينك ده فيه ناس بتحلم بس بنصه.
تصريحات عمرو الليثي
واستشهد بقول الله تعالى: وقليلٌ من عبادي الشكور، مؤكدًا أن الشكر الحقيقي يظهر في الرضا عن تفاصيل الحياة وعدم التركيز على ما ينقصنا فقط.
وتابع قائلًا: بص لأي مشكلة عندك، وهتلاقي إن ربنا ما كانش يحطك فيها إلا لو كنت قدّها، ومهيّأ ليها، لأنه قال في كتابه الكريم: لا يُكلف الله نفسًا إلا وسعها.
وأشار الليثي إلى خطورة التذمر الدائم، قائلًا: ما تخليش كلامك كله شكوى وجحود، بدل ما امتحانك يتقلب اختبار صبر.. وممكن تكون مش قدّه، وساعتها هتتمنى ترجع لحياتك اللي كنت شايفها عادية، مع إنها في الحقيقة مش عادية خالص، ونعمة كبيرة وأنت مش واخد بالك.
وفي جزء آخر من كلمته، تطرق الليثي إلى قيم البساطة واللين في التعامل مع الآخرين، قائلًا: لو لقيت شخص طبعه السهولة، اوعى تفرّط فيه، الإنسان السهل مفيش أجمل منه، سهل يسامحك، ويعذرك لو قصرت، سهل تتناقش معاه وتاخد رأيه.
وأضاف: عتابه خفيف زي النسمة، وخصامه صمت، وفرحته مفرحة، خليك بسيط وسهل، ما تخوفش حد منك، وما تخلقش حواجز نفسية بينك وبين اللي حواليك، صدقوني، اللي نصيبه في الدنيا قلب لين، هو اللي فاز فعلًا.
