عبد الرحيم كمال: حذفت جملة من مسلسل قهوة المحطة على عيني بعد رئاستي للرقابة
كشف الكاتب والسيناريست الكبير عبد الرحيم كمال، تفاصيل حذفه جملة من مسلسله قهوة المحطة بطولة أحمد غزي، الذي عُرض في السباق الرمضاني الماضي وحقق نجاحًا كبيرًا، وذلك بسبب توليه منصب رئيس الرقابة على المصنفات الفنية.
عبد الرحيم كمال: حذفت جملة من مسلسل قهوة المحطة على عيني بعد رئاستي للرقابة
وقال عبد الرحيم كمال، خلال ندوة صناعة السينما بمهرجان الجونة السينمائي: كان عندي مسلسل قهوة المحطة في رمضان، وأنا توليت رئاسة الرقابة مع بداية شهر رمضان يوم مش هنساه، وكان الحلقة رقم 13 فيها جملة اتصلت بالمخرج إسلام خيري الساعة 12 قولتله احذف الجملة دي، وعلى عيني اتحذفت.
وأضاف: ده الفاصل بين إنك عارف أي عائلة في الدنيا فيها اللي بيحب أوي شغلك واللي بيسألك سؤال سخيف هو إنت ليه في المشهد ده خليتها تقول كده؟، واللي يبقى على نياته، وأنت في اللحظة دي جزء من هذه العائلة مش الفنان اللي شايف نفسه على حق.
وأوضح: على عيني الجملة اتحذفت كأني بقطع من جلدي، ولكن مراعاة لهذه الأمانة، ولو سيبت رئاسة الرقابة على المصنفات الفنية هرجع الجملة تاني، لكن هنا ببقى جزء من العائلة، وبقدر المرونة اللي جوايا بقيت مسؤول عن آخرين ممكن يكون أفقهم أو نظرتهم مختلفة، لكن أنا جزء من نسيج الوطن.
مسلسل قهوة المحطة
مسلسل قهوة المحطة هو بطولة جماعية للنجوم أحمد غزي والفنان أحمد خالد صالح والفنان بيومي فؤاد ورياض الخولي وهالة صدقي وانتصار وحسن أبو الروس وفاتن سعيد وعلاء مرسي وضياء عبد الخالق وعلاء عوض ويوسف عثمان وأحمد ماجد وغيرهم، والعمل من تأليف الكاتب الكبير عبد الرحيم كمال، وإخراج إسلام خيري.
