روجينا عن تعاونها مع ابنتها: قلتلها أبوس إيدك إخرجيلي مسلسلي في رمضان.. والنجوم المسيطرين أبناء فنانين
كشفت الفنانة روجينا، تفاصيل أولى التجارب الإخراجية الدرامية لـ ابنتها مايا أشرف زكي، حيث ستخرج مسلسلها الرمضاني المقبل 2026، موضحة أن ابنتها لم تعتمد على الواسطة كما يعتقد البعض.
وقالت روجينا، في لقائها مع القاهرة 24: أكتر حاجة سعدتني أن الناس كلها فرحانة لـ مايا، هي تستحق وخطوتها تأجلت أوي وكل المخرجين والممثلين اللي اشتغلوا معاها قالوا لها لازم تاخد الخطوة، ولكن هي كانت عايزة تخلص كل حاجة قبل ما تاخد خطوة الإخراج، يعني هي خلصت المعهد وعملت أفلام كتير، واشتغلت مع أبوها الروحي رامي إمام وعادل إمام ونادين خان وأحمد الجندي، دول مدارس مختلفة، وسافرت لندن وعملت مشروعها وكان الأول هناك.
وتابعت روجينا: مايا بتصور فيلم مشغولة فيه وظروفه أنها لازم تصور في فصول معينة في السنة، قلتلها أبوس إيدك تعالي أعملي مسلسلي، قالتلي لأ مش عايزة أشتغل معاكي أنا قاعدة على فيلمي، قلتلها علشان خاطري لأني عارفة أنها لو عملت الفيلم أنا مش هشفها تاني مش هتخرجلي في حياتي، لأنها مبتحبش وعندي مبدأ مش عايزة أشتغل مع أبويا ولا أمي ولا عمتي.
روجينا عن دخول ابنتها عالم الإخراج: اللي يقول بالواسطة يقول
وعن اعتقاد الجمهور عمل ابنتها مايا بالوسط الفني من خلال الواسطة، فعلقت روجينا: اللي يقول بالواسطة يقول أهم نجوم دلوقتي مسيطرين على الشاشة أبناء فنانين زي كريم عبد العزيز وأحمد السعدني ومحمد عادل إمام، كلهم نجوم صف أول، لأنهم اتولدوا في هذه البيئة، ولاد الدكتور بيبقوا دكاترة وولاد المهندس بيبقوا مهندسين، وأنا اتحايلت عليها كتير وادعوا لنا.
