يسرا: الـ 25 فيلما اللي قدمتهم ببدايتي سقطوا.. وأجري في الإرهاب والكباب كان 10 جنيهات
تحدثت الفنانة يسرا عن بداياتها في مجال الفن والصعوبات التي واجهتها خلال تلك الفترة، بعد مشاركتها في عدد من الأعمال التي لم تحقق النجاح المنتظر، بجانب حديثها عن ذكرياتها مع فيلم الإرهاب والكباب، وذلك خلال ندوة تكريمها بمهرجان الجونة السينمائي في دورته الثامنة.
يسرا: الـ 25 عملا اللي قدمتهم في بدايتي سقطوا
وقالت يسرا خلال ندوتها: الـ 25 فيلما اللي عملتهم في بداية حياتي سقطوا سقوط ذريع، قلت طب هكمل ليه والغلط جاي من مين؟، بدأت أحاسب نفسي وروحت المعهد وأنا مش تلميذة فيه.
كما تطرقت للحديث عن علاقتها بالجمهور، وقالت: الوقت علمني إن حتى لما يبقى في حاجة مضايقاني الجمهور ملوش ذنب، إنتو ليكوا حق عليا إلى حد ما وإني أكون معاكم، بس إن حياتي تكون مفتوحة تمامًا قدامكم دي حاجة مش هتريحني، والنهاردة بنقول كلام على السوشيال ميديا وبيتقص وكل واحد بيعمل حاجة على مزاجه ف ده بيخليني أكون واخدة بالي أكتر.
أما عن استعانة فستانها من فيلم الإرهاب والكباب لعرضه في مهرجان الجونة، قالت: أنا فتحت ستين شنطة عشان أطلع فستاني في الإرهاب والكباب عشان يحطوه في المعرض بتاعي في مهرجان الجونة، لما دخلت المعرض شوفت حياتي من ساعة ما اتولدت، أنا فخورة إن فات 50 سنة وأنا محستش بيهم، استفدت من الرحلة بتاعتي وحسيت إني عملت أسطورة للناس اللي بعدينا.
وواصلت: ممتنة أوي لكل الناس اللي أضافوا لحياتي من يوم ما مثلت لغاية دلوقتي من غير حب الناس مفيش حاجة مهما عملت، مفيش حد ممكن يوصل لخمسين سنة شغل من غير حب الجمهور وزمايلي.
كما كشفت يسرا عن أجرها في فليم الإرهاب والكباب، وقالت: وحيد حامد بعتلي على فيلم الإرهاب والكباب ولقيت الاسكريبت شخصيتي مكتوبة فيه فتاة ليل مشهد واحد، أخدت أجر 10 جنيهات، وصممت فستاني الأحمر في يوم واحد، وطلع العمل زي ما أنتو شوفتوه وبرغم إنه مشهد واحد قولت لـ أستاذ وحيد أنا جاهزة أمثل معاك وإديني 10 جنيهات أجر.
آخر أعمال الفنانة يسرا
تعٌد آخر أعمال الفنانة يسرا مشاركتها كضيفة شرف في مسلسل بريستيج، والذي دارت أحداثه حول عاصفة قوية تضرب شوارع القاهرة، مما يجبر 14 شخصًا من خلفيات اجتماعية مختلفة على اللجوء إلى مقهى في وسط البلد، وبينما يحاول الجميع الاحتماء من العاصفة، ينقطع التيار الكهربائي فجأة، ليكتشفوا أن أحدهم قد قُتل، ومع تصاعد التوترات، يدركون أن القاتل بينهم.
