التصوير وحش.. سيدة تروي مشاهدتها لتعرض صغير شهير للإساءة من والدته بسبب فيديو على السوشيال ميديا
تصدر منشور لـ سيدة تدعى عالية عدل، التريند خلال الساعات القليلة الماضية، حيث روت في منشور لها عبر حسابها الشخصي بموقع فيسبوك، مشاهدتها لـ موقف إساءة تعرض له طفل مشهور عبر السوشيال ميديا، من قبل والدته، بسبب تصويره لأحد الفيديوهات بشكل خاطئ.
سيدة تروي مشاهدتها لتعرض صغير شهير للإساءة من والدته بسبب فيديو على السوشيال ميديا
وقالت: أول مرة أشوف موقف قدام عيني فيه إساءة نفسية للأطفال متناسبة جدًا مع القُبح اللي وصلناله في العصر الحالي، بلاعب بنتي في مكان فيه مراجيح للأطفال، ولقيت طفل لا يتعدى الـ 8 سنين، عرفت ملامحه لإن طلعلي فيديو ليه قبل كده وهو مشهور، واقف وماسك الموبايل قدامه وبيسجل فيديو بيتكلم فيه كأنه بيسمع كلام حافظه وبلمح بطرف عيني لقيت مامته واقفة قدامه مستنياه يخلص.
وتابعت: الولد خلص ونزل إدى الموبايل لمامته عشان تشوف الفيديو، الأم نهرته وكلمته بطريقة سيئة وسوقية جدًا، قالت له: هو ده منظر فيديو؟.. التصوير وحش ومش جايب المنظر وراك مظبوط زي ما قلتلك، والولد بيمد إيديه لمامته عشان يعتذرلها قامت زقت إيديه وبعدته عنها، ومشيت وسابته وهو عمال يحايل فيها لحد ما رجعت لترابيزتها.
وأضافت: الموقف ده خضني جدًا لإني أول مرة أشوف الجانب الآخر من الفيديوهات اللي بلاقي فيها كومنتات على العيال إنهم كيوت وبيتكلموا زي الكبار، وإزاي موهوبين كدة!.. الجانب الآخر المنطقي جدًا بالمناسبة إن يكون فيه شخص بالغ عاقل بيدير أكاونت الطفل ده وبيضغط عليه مجتمعيًا وعاطفيًا عشان يدخل عالم السوشيال ميديا اللعين بكل الظلام اللي فيه، ليه وعشان إيه؟، والعيال دي هيحصلها إيه لما تكبر؟.
