خلال أولى جلسات المحاكمة.. ننشر اعترافات علياء قمرون في اتهامها بغسل الأموال وخدش الحياء العام
بدأت المحكمة الاقتصادية، اليوم الخميس، أولى جلسات محاكمة البلوجر علياء قمرون لاتهامها بغسل الأموال وخدش الحياء العام عبر مواقع التواصل الاجتماعي من خلال فيديوهات تظهر بها تتضمن ألفاظًا وإيحاءات بها تعدٍّ على قيم وعادات المجتمع المصري.
نص تحقيقات علياء قمرون
وينشر القاهرة 24 التحقيقات كاملة، في قضية علياء قمرون في اتهامها بغسل الأموال وخدش الحياء العام عبر مواقع التواصل الاجتماعي، من خلال فيديوهات تظهر بها تتضمن ألفاظًا وإيحاءات بها تعدٍّ على قيم وعادات المجتمع المصري.
وجاء هذا كما يلي:
أنا بنت وحيدة وأبويا وأمي منفصلين من وأنا عندي 3 سنين، وأمي اتجوزت بعد كده دكتور بيطري عنده عيلين وبعدين خلفت منه 5، وأبويا اتجوز وأنا عندي 8 سنوات ومراته فضلت على ذمته لمدة 5 سنوات وبعد كده خلعته، ومخلفش منها وبعدين راح اتجوز واحدة تانية أصغر منه بـ 25 سنة تقريبا، وخلف منها 3 عيال ولدين وبنت.
ننشر اعترافات علياء قمرون في التحقيقات
وواصلت: لما أبويا وأمي اتطلقوا كنت عايشة مع أبويا بس كانت مرات أبويا الثانية بتقعد تضربني وتقول عني لأبويا كلام مش حقيقي، وهو إني بكلم ولاد وأبويا كان يسمع كلامها وبيضربني ومرة حلقلي شعري.
وأضافت البلوجر علياء قمرون في التحقيقات: أنا سيبت البيت عند أبويا من سنة تقريبا وروحت عشت مع خالتي أخت والدتي في أشمون، وبعدين بسبب جوزها علشان مكنش عايزني أقعد معاهم علشان متقلش عليهم في المصاريف لأن ظروفهم المادية مش حلوة، فروحت عشت لوحدي وأجرت شقة عند دوران الجملة في طنطا، وفضلت قاعدة فيها لحد دلوقتي.
وأردفت علياء قمرون خلال التحقيق معها: كنت وعلى مدار حياتي بكلم أمي وأطلب منها إن أروح أعيش معاها لكن كانت بترفض علشان جوزها مكنش عايزني أعيش معاهم، وكان بيقولها إن أنا معرفش أعتمد على نفسي وهي مكنتش تخليني أعيش معاها بسبب جوزها.
وتابعت التيك توكر علياء قمرون: أنا أمي ربة منزل وأبويا بيبيع أسلحة وذخائر خاصة بصيد الطيور البرية وبيصطاد طيور برية وبيبيعها ومرة اتمسك بسبب إن حد بلغ إن السلاح اللي بيبيعه مش مترخص، واتحبس وبعد كدة طلع بس معرفش براءة ولا كفالة.
وأكملت: اسمي علياء شوقي فوزي وشهرتي علياء قمرون وكنت شغالة قبل كده عاملة نظافة في مستشفى الجامعة في طنطا، وحاليا شغالة على السوشيال ميديا.
