مؤلف مسلسل كارثة طبيعية بطولة محمد سلام: العمل يناقش قصة واقعية بتحصل في العالم كله
كشف الدكتور أحمد عاطف فياض، مؤلف مسلسل كارثة طبيعية، بطولة الفنان محمد سلام، تفاصيل العمل ردًا على تساؤولات الجمهور بعد عرض برومو العمل، بجانب الكشف عن حقيقة تحضير جزء ثاني من مسلسل بالطو بطولة الفنان عصام عمر، الذي حقق نجاحًا كبيرًا بجزئه الأول.
وكتب أحمد عاطف فياض، عبر حسابه بموقع فيس بوك: إجابات سريعة على أسئلة بتتسألي كتير منذ نزول برومو كارثة طبيعية، المسلسل 10 حلقات، هينزل حلقتين كل يوم أربعاء بداية من الأربع الجاى بإذن الله على Watch It.
وتابع: كارثة طبيعية مش مسلسل خيال علمي ولا حدث خارق للطبيعة.. هو قصة واقعية لزوج وزوجة مصريين عاديين بيمروا فجأة بحدث بيشقلب حياتهم تماما، والحدث ده ممكن يحصل لأي حد عادي، وهي إن الزوجة بتحمل فى 5 أطفال مرة واحدة كحالة توائم متعددة، ودي حالة حصلت كتير بالمناسبة في مصر والعالم كله، والرقم القياسى المتسجل في مصر لحالات التوائم المتعددة هي ست جابت 9 أطفال في بطن واحدة.
وأضاف: نوع المسلسل: بلاك كوميدي دراما، وأيوة اللي شوفتوه ف البرومو صح.. الأستاذ كمال أبو رية معانا في المسلسل وبقينا أصدقاء جدا، أول حلقتين بعد بكرة 10 صباحا، يعنى تصحوا بدرى متكدرين تفطروا تلاقوا الحلقات موجودة أظن مفيش دلع أسوأ من كده.
مؤلف مسلسل بالطو يكشف حقيقة تحضير جزء ثاني
كما كشف أحمد عاطف فياض، حقيقة تحضير جزء ثاني من مسلسل بالطو، قائلًا: فين بالطو 2؟.. مبسوط طبعا جدا إنكم بعد سنتين ونص تقريبا لسة بتسألوني على بالطو 2 في كل مناسبة، بس الحقيقة أنا مش عارف مين قال إن فيه بالطو 2.
واختتم: بالنسبالي قصة دكتور عاطف خلصت وماكنتش حابب فكرة إني أكتب جزء تاني لمجرد استغلال نجاح الجزء الأول بدون ما يكون فيه حاجة معينة عايزين نقولها من المسلسل، وده كمان مكنش رأيي لوحدي، لأ كان رأي المنصة اللي كانت مقتنعة بكده جدا وكانت ضد استغلال النجاح، وكذلك أصدقائي الأعزاء عصام عمر وعمر المهندس كانوا بيفكروا بنفس الطريقة دي وده نفس رأيهم.
