مدرب بتروجيت عن التعادل مع الأهلي: الفريق كان في أحسن حال.. والنتيجة كرم من ربنا
علق سيد عيد، المدير الفني لنادي بتروجيت، على تعادل فريقه مع النادي الأهلي، في المباراة التي أقيمت على ستاد الكلية الحربية.
تصريحات سيد عيد
وقال سيد عيد في المؤتمر الصحفي عقب المباراة: الفريق كان في أحسن حال، والنتيجة كرم من ربنا، وبنلعب قدام فريق كبير زي الأهلي اللاعبين كانوا جاهزين كويس للمباراة وتم تجهيزهم بشكل جيد.
وأكمل: هدف التعادل كان في كرة فيها دفعة ولكني لم أرها، ولكن هناك أقاويل واستطعنا استكمال اللقاء والخروج بهدف، ولا يوجد أي مدرب لا يلعب على الفوز.
وأضاف: من أساسيات الشغل في المباريات الكبيرة، اللاعب بيكون تركيزه 200% من أجل استغلال كل فرصة ممكن الأهلي يعمل 10 فرص لكن ما يسجلش منهم
وزاد: الأهلي مغيرش طريقة لعبه ولكن الأهلي بيلعب بقدرات لاعبيه عشان كده بيكون عنده فكر أنه هيكسب في أي وقت ومفيش حاجة كده في الكرة.
وعن مشاركة حامد حمدان؟، قال سيد عيد: اللاعب أخطأ في الأول كان عايز يروح نادي تاني وهو اللي امتنع من نفسه وقرر مينزلش التدريبات وبالتالي الإدارة اتعاملت مع الموقف لما اللاعب رجع النادي تعاملت معه مثل ابني، واللاعب اعترف بالخطأ ولما لقي أن ده النادي اللي خلاها يروح منتخب فلسطين ولعبناه كمساك وكان تركيزه 200% عشان كده الفرصة لما جيتله قدر يجيب هدف.
واختتم تصريحاته قائلا: لدينا اهداف كثيرة هذا الموسم ونتمنى أن نكون في المراكز الأولى مثل الموسم الماضي.
