قبل افتتاح المتحف المصري الكبير.. عمرو سلامة: اليومين دول عندي إحساس بالفخر إني مصري
أعرب المخرج عمرو سلامة عن سعادته الكبيرة بـ افتتاح حفل المتحف المصري الكبير، مؤكدًا أن هذا الحدث مصدر فخر واعتزاز لكل المصريين.
وكتب عمرو سلامة عبر حسابه الرسمي بـ فيس بوك: اليومين دول عندي إحساس بالفخر إني مصري، لكن لأسباب مختلفة وأنا صغير كنت متضايق قوي إن يكون مصدر فخرنا كمصريين فقط "التمحك" بحضارة أجدادنا المصريين القدماء، وفكرة "أحفاد الفراعنة"، وإحنا أصلا جينتنا دخل عليها ألف دخيل وغازي ومستعمر، وبقينا خليط من الرومان والعرب والتراكوة وغيرهم، ونكون بنفتخر بحاجة مش إحنا اللي أنجزناها، أنجزها ناس ماتوا من آلاف السنين زي إبن الأغنياء الفاشل اللي بيفتخر إن جده كان باشا وعيلته بنت أصول.
وتابع: كمان كنت بتضايق من الافتخار بنماذج تعد على الأصابع من بشر نجحوا بس علشان طلعوا برا أو علشان الغرب أبو عيون ذرقا إداهم صك النجاح بتقدير أو جائزة، لكن دلوقتي أنا فخور إني مصري، مش علشان حفيد حضارة عظيمة كبيرة وقديمة، لكن علشان إحنا بنعمل إيه دلوقتي بيها، افتتاح المتحف المصري الجديد مصدر فخر، بعيدا عن مين بدأه ومين عمله ومين موله، فكرة إننا هنقدر تراثنا بشكل عصري ومهيب تستحق الفخر، وكمان أنا فخور بموقف الشعب المصري مع قضية كنا فاكرينها بتموت، تعاطف لا حدود له، ووعي، وصوت عالي بالتأكيد أثر في السردية العالمية بمقدار ما.
واختتم: أنا فخور حتى بكل فن أو طريقة تعبير طلعت من الشارع ومن قلب شباب ماستنوش ختم الإعلام الرسمي، عملوا أغاني وأفلام وستاند آب كوميدي ومحتوى، ومهما اتحاربوا بأشكال مختلفة عرفوا يبقوا مشاهير ومؤثرين من غير مؤسسات تدعمهم وعبروا عن جيل ماحدش كان معبره وإن الأجيال الصغيرة اللي كنا فاكرينهم لا مكترثين وأنانيين، عندهم جوهر منور جواهم، قادرين يعبروا عن نفسهم ومهتمين بشؤون تبعد عنهم آلاف الأميال.
