عمر كمال: الناس انتقدت صناع ألبومي الجديد وقالوا سقطة في تاريخهم.. وبعض النجوم رفضوا أن نقدم دويتو
علق المطرب عمر كمال، على الانتقادات التي تعرض لها وقت الكشف عن صناع ألبومه الجديد، مستنكرًا تعرضه للهجوم بعد وصف الجمهور للتعاون بالسقطة في تاريخ الصناع ومنهم الفنان رامي جمال، والشاعر تامر حسين، والملحن عزيز الشافعي، ومدين، وغيرهم.
وقال عمر كمال في تصريحات تليفزيونية: كنت محظوظ أني تعاونت مع ناس لها اسمها ونجاحها الكبير، زي تامر حسين وعزيز الشافعي ومدين ومصطفى العسال وتوما ورامي جمال، ناس كتير جدًا الحمد لله ربنا كرمني وحققت حلمي أني اشتغلت معاهم.
وتابع عمر كمال: لما نزلتي صوري مع صناع ألبومي الجديد زي رامي جمال وعزيز الشافعي ونادر حمدي، الناس قالت سقطة في تاريخهم، ليه مش أنا بني آدم ومن حقي أجرب؟، دي ناس سوية وشبعانة شهرة ونجاح وفلوس مفيش أي حاجة تجبرهم يشتغلوا معايا إلا لو شايفين فيا حاجة كويسة، وفي نجوم كنت بطمح أني أعمل معاهم دويتوهات وشبه الاتفاق حصل وبعد كده رفضوا، أنا مبسوط وده إداني تحدي أكبر وهثبت لهم أنهم على غلط وأني استحق، أنا لازم أجرب، اللي مالوش قلب مالوش رزق.
عمر كمال: إن شاء الله ألبومي يبقى رزقه من اسمه.. وربنا كرمني بـ فرصة وانتهزتها
وواصل: ألبومي اسمه عمر كمال الرهان كسبان، وإن شاء الله يبقى رزقه من اسمه، وده كان لوني الأساسي من البداية وزمان كنت بغني للغربة وبغني لـ أبويا، كان ليا تجارب كتير في الأول ولكن منجحتش النجاح اللي كنت منتظره علشان مبقاش كداب، وأنا كل 5 سنين في حياتي لازم أسأل نفسي وصلت لـ إيه وهتعمل إيه.
واختتم: وحصل الصدفة والخير من ربنا أن دي كانت السنة الخامسة ليا في الشعبي وعايز أجدد لوني الموسيقي، وربنا كرمني بـ فرصة كويسة أني أدخل من الباب الكبير لـ عالم البوب هيتنفذ بشكل رائع فانتهزت الفرصة وأخدتها.
