قتلتها عشان دمرتني وضيعتني.. اعترافات جديدة وصادمة لدكتور جامعي قتل طليقته بشبرا الخيمة
بملامح منهارة وصوت يختلط بين الغضب والانكسار، جلس المتهم "أحمد. ف. ع. ح"، 55 سنة، أستاذ جامعي بإحدى جامعات السويس، ليحكي تفاصيل حكاية زواج انتهت بجريمة بشعة في شارع 15 مايو بشبرا الخيمة.
بدأ حديثه قائلا في اعترافاته أمام جهات التحقيق: تعرفت عليها في سوهاج من خلال شقيقتها اللي كانت طالبة عندي.. وأكتر حاجة كانت عجباني فيها أنها جميلة.. وأنا كنت هموت عليها وأعمل معاها علاقة بأى طريقة، وده اللي خلاني أتجوزها رسمي، وخلفنا ولد بعد عمليات كتير.. طفل أنابيب اسمه إياد، 7 سنوات.
كان يتحدث وكأن حياته كانت صراعا بين الهوى والغضب: أنا أصلا كنت متجوز ومعايا ولد دكتور.. لكن كنت منفصل وقتها.. جوازنا مكانش حب.. أنا كنت عايز شهوته بس وأطلقها ومكنتش عاوز أكمل معاها.. بس أهلي حبّوها وكانوا دايمًا يضغطوا عليّ."
اعترافات جديدة وصادمة لدكتور جامعي قتل طليقته
تغير صوته وهو يسترجع بداية السقوط: أول مشكلة حصلت بينا كانت على شقتي في الشيخ زايد.. قلت نبيعها رفضت.. اتطلقنا آخر طلقة.. بعدها لقيتها رافعة عليا قضايا كتير.. نصب، تزوير، تبديد نفقة، ضرب، تحرش، سب، وفي الآخر كسبت قضية تمكين وخدت مني الشقة.
ثم ضرب بيده في الهواء غاضبًا: أنا ماعملتلهاش محضر غير مرة واحدة في 2025، اتهمتها بسرقة عفش مراتي الأولى.. وبرضه دخلتني السجن.
يتنفس ببطء كأنه يخنق الكلمات: كان عندي عمارة كاملة ورثتها من أبويا.. أربع شقق بعتها كلها على المحامين والقضايا وفي الآخر قعدت في أوضة تحت بير السلم هي اللي قعدتني فيها وأنا اللي بنيتها بدل المخزن.
ثم بصوت منهزم لكنه يحمل نارًا مكتومة: ماقدرتش أسيب البيت كنت حاسس إنها كسبت، خدت مني كل حاجة حتى شقة مراتي الأولى أم ابني الكبير.. اتقفلت الأبواب في وشي اتفصلت من الجامعة بقت حياتي صفر مش لاقي أكل.
ويصل للحظة الانفجار: يوم الحادث كنت راجع حوالي 5 ونص المغرب.. واحد في الجراج نده علي وقال في حد غريب حوالين العمارة.. بصيت لقيته شاهد شهد ضدّي قبل كده دخلت لقيتها نازلة من السلم افتكرت السجن والفصل والذل.. حصلت مشادة وشتايم فجأة لقيت نفسي بجري على الأوضة جبت السكينة ورجعت أطعن أطعن.. وأنا مش حاسس.
كأن الزمن توقف عند الدم الأول، يقول: الناس نطت عليا وضربوني وهي غرقانة في دمها كانت آخر كلمة قالتها: أنا غلطانة.. واللي أنت عايزه هعملهولك.. بس بعد ما ضيعت حياتي؟
ثم يرفع رأسه بثبات بارد يقطع الأنفاس: عرفت إنها ماتت في القسم، أنا لا باخد مخدرات ولا مجنون.. مش ندمان على قتلها.. لأنها كانت شر وراحت وربنا هيحاسبها.
وكانت شهدت منطقة شارع 15 مايو بمدينة شبرا الخيمة بمحافظة القليوبية، جريمة قتل بشعة، حيث أقدم أستاذ جامعي على قتل طليقته طعنًا أمام المارة، ما تسبب في حالة صدمة ورعب بين المواطنين، وجرى إخطار اللواء أشرف جاب الله مساعد وزير الداخلية لقطاع أمن القليوبية.
تلقى اللواء محمد السيد مدير المباحث الجنائية إخطارًا من اللواء وائل متولي رئيس مباحث المديرية، والمقدم مصطفى دياب رئيس مباحث قسم ثان شبرا الخيمة، بورود بلاغ من الأهالي يفيد قيام شخص بطعن سيدة أمام أحد المطاعم وسقوطها غارقة في دمائها.
وبالانتقال والفحص، تبين العثور على جثة المجني عليها "نادية س م"، 44 سنة، سمسارة وتاجرة ومقيمة بمنطقة الكابلات، مصابة بطعنة نافذة بالرقبة وعدة طعنات متفرقة في الجسد، وتم نقل الجثة إلى مستشفى ناصر العام تحت تصرف النيابة العامة.
وبتكثيف الجهود وإعداد الأكمنة، تمكنت قوة من مباحث القسم من ضبط المتهم والسلاح المستخدم.
وبمواجهته، اعترف تفصيليًا بارتكاب الجريمة بدافع خلافات زوجية وقضايا متبادلة بينهما.
وأمرت النيابة العامة بحبس المتهم 4 أيام في حينها، على ذمة التحقيقات مع مراعاة التجديد له في المعاد القانوني.
