إلهام شاهين خلال زيارتها لـ الكنيسة المصرية الأرثوذكسية بـ ناشفيل: لما بيسألوني عن ديانتي بقول مؤمنة
تحدثت الفنانة إلهام شاهين، عن وجهة نظرها الدينية، موضحة أنها مؤمنة بجميع الرُسل والكٌتب الدينية التي أٌنزلت، بجانب الحديث عن دور الفن الإنساني ومناقشة القضايا الإنسانية.
وقالت إلهام شاهين، خلال زيارتها لـ الكنيسة المصرية الأرثوذكسية بـ ناشفيل: في الإسلام فيه في سورة البقرة تعريف للمؤمن، مكتوب المؤمن من آمن بالله وكتبه ورسله، يعني مقالش وكتابه وروسوله، يعني أنا مينفعش أكون مؤمنة إلا لو آمنت بكل الرُسل والكتب السماوية، وده مبدأي ولما بيسألوني دينك إيه بقول إني مؤمنة، لأني مؤمنة بكل الرسالات السماوية ومش هقول الأديان لأن وجهة نظري إن ربنا خلق دين واحد نزل في عدة رسالات سماوية على مراحل علشان المجتمعات تعرف يعني إيه دين، اللي اتعمل علشان يعمل لنا قوانين ويعلمنا الأخلاق.
وتابعت إلهام شاهين: الرسول محمد عليه الصلاة والسلام، قال إنما بُعثت لأتمم مكارم الأخلاق، يعني كان في أخلاق قبله من الرسل اللي سبقوه وهو بيتمم مكارم الأخلاق، وده اللي مطلوب مننا يبقى عندنا أخلاق وإنسانية ونتمم بعض، من أول أبو الأنبياء سيدنا إبراهيم ومرورًا بكل الرسل أنا مؤمنة أن ربنا خلق دين واحد نزل في عدة رسائل سماوية كلهم بيكملوا بعض.
وأضافت: أنا بدخل الكنيسة بحس بقدسية شديدة ورهبة وأني فرحانة وقريبة من ربنا، وبدخل الجامع بحس بنفس الإحساس أن ده مكان للصلاة وطاقة إيجابية.
إلهام شاهين: لما بقدم دور شر بيكون وراه رسالة
أما عن دور الفن في مناقشة القضايا الاجتماعية الإنسانية، فأوضحت إلهام شاهين: الفن كمان بيقدم قضايا اجتماعية وبيكون في رسالة، حتى لما بعمل دور شر فيه وراه رسالة إنسانية وبنعلم المشاكل للناس، وزي ما بنساعد الفقراء بنقدم مشاكلهم، وبنعبر عن الناس.
