سيدة بالدقهلية تستغيث: عمة أولادي حرماني منهم من سنتين.. ونفسي أحضنهم

استغاثت سيدة من محافظة الدقهلية تُدعى إيمان.م لتنفيذ حكم قضائي يضمن لها رؤية أولادها، بعد عامين من الغياب القسري عنهم، مدعية أن حرمانها جاء بسبب تعنت عمتهم، رغم أن الحضانة مُنحت للجدة أم الأم.

وقالت الأم في تصريحات لموقع القاهرة 24: كنت متجوزة وانفصلت عن جوزي، وبعد الطلاق أولادي عاشوا مع والدهم، ورفعت قضايا النفقة والمتعة والحضانة، وبعد وفاة والدهم، كان نفسي أولادي يعيشوا معايا كأم، وكنت متزوجة بعد انفصالي عن أبو أولادي، لكن بعد وفاة والدهم انفصلت عن زوجي الجديد علشان أقدر أعيش مع أولادي.

وأضافت: الحضانة اتحكمت للجدة، لكن عمتهم رفعت قضايا جديدة ومنعتني حتى من رؤية أولادي، وده خلاني أعيش صراع كبير كل يوم وأنا بعاني من بعدهم.

وزعمت الأم: ابني كان تعبان، فرحت أخدته هو وأخته التوأم من عند الدرس، لكن بنتي الكبيرة لسه عند عمتها.. العمة بتهددني وتقول لي إن حياتي المهنية والاجتماعية هتتدمر لو ما تنازلتش عن حقوقي.

وادعت والدة الصغار: كل اللي نفسي فيه إني أحضن أولادي وأعيش معاهم، أسمع ضحكتهم، أشاركهم كل لحظة بعد سنتين من الفراق.

واختتمت: الحياة صعبة من غيرهم.. نفسيتي وحياتي كلها اتغيرت، محتاجة تدخل الجهات المختصة علشان أقدر أمارس حقي كأم وأدي أولادي الحب والأمان اللي يستحقوه.