بعد قليل.. نظر استئناف المتهمين بإنهاء حياة مينا موسى على إدانتهما بالإعدام والمؤبد
تنظر محكمة مستأنف شمال القاهرة المنعقدة بالعباسية، اليوم الاثنين، جلسة استئناف المتهمين على حكم الإعدام الصادر ضد المتهم الأول، والمؤبد على المتهم الثاني، في قضية إنهاء حياة مينا موسى ممرض المنيا وتقطيع جثمانه بالزاوية الحمراء.
استئناف المتهمين بإنهاء حياة مينا موسى على إدانتهما بالإعدام والمؤبد
وينشر القاهرة 24 الاعترافات الكاملة للمتهمين بقتل مينا موسى ممرض المنيا أمام جهات التحقيق وتفاصيل وكيفية قتله وتقطيع جثته إلى أشلاء، وإلقاء جثته في ترعة الإسماعيلية.
وقال المتهم الأول إبراهيم. ر، في اعترافاته: اسمي إبراهيم دبلوم صنایع وبشتغل عامل في المنيا، لحد ما اتفتح قدامي مجال إني أكون جليس لكبار السن في القاهرة.
وأضاف المتهم: أنا من الضيقة اللي أنا فيها بدأت أفكر ازاي أجيب فلوس وفي يوم 28 / 9 / 2024 قبل يوم الواقعة مصطفى ابن خالتي جه يبات معايا في البيت اللي أنا شغال فيه، وكنت بتكلم معاه في الظروف الصعبة بتاعتي وإني محتاج فلوس قالي إن هو كمان ظروفه صعبة والدنيا مخبطة معاه، قعدنا نفكر نجيب فلوس ازاي لحد ما جه في دماغي إننا نستدرج حد نجيبه على البيت اللي أنا شغال فيه نسرقه عشان الحاج محمد اللي أنا شغال معاه مبيتحركش إلا لما أنا أسنده، وجه في بالي واحد كان كلمني من فترة كبيرة سألني على شغل مع حد مسن وأنا سجلت رقمه من ساعتها، فكلمته من خط مش متسجل عملت فيها واحدة ست، وقولتله إني محتاج حد جليس مع راجل كبير، بس هو قالي إنه شغال ورشحلي مينا واداني رقمه وقالي إنه كان بيدور على شغل.
وواصل المتهم بقتل مينا موسى في التحقيقات: كلمت مينا موسى وعملت إني واحدة ست برضو وقولتله نفس الكلام إني محتاج حد جليس مع راجل كبير بمرتب 350 جنيه في اليوم، وقالي إنه جاهز وقولتله إنه هيبدأ من يوم 29 / 9 / 2024، واتفقت معاه إنه ييجي الساعة 11 الصبح وقولتله يركب مواصلات ميدان السواح وينزل عند مصنع، وقعدت أنا ومصطفى نتفق هنعمل إيه واتفقنا إن أنا هنزل أجيب مينا لما يوصل ومصطفى هيكون في البيت مستخبي ورا الباب ومعاه ماسورة حديد وأول ما ندخل أنا ومينا وأقفل الباب هو يهدد مينا عشان ميعملش صوت ونسرقه ونمضيه على وصل أمانة أو نطلب فدية.
