خريجة آثار.. أول تعليق من صاحبة تريند Get Ready With siti مع تماثيل المتحف المصري الكبير
كشفت صاحبة فيديو تريند Get Ready With Sitti، الذي أثار موجة واسعة من الجدل بعد تصويره داخل المتحف المصري الكبير، تفاصيل ما حدث، مؤكدة أن الفيديو فُهم بشكل خاطئ وأنها لم تقترب من التماثيل الأثرية أو تُسبب أي ضرر لها.
أول تعليق من صاحبة تريند Get Ready With Sitti مع تماثيل المتحف المصري الكبير
وقالت سارة، وهي خريجة كلية الآثار بجامعة المنصورة، في أول تعليق لها خلال القاهرة 24: الناس فهمت غلط وشافت الفيديو من زاوية مختلفة، لكن الحقيقة إني كنت بعيدة تمامًا عن التماثيل الفرعونية والقطع الأثرية، ومفيش أي ضرر حصل، الفيديو جه معايا بالصدفة ومفيش تريند، الناس كلها كانت بتتصور في المتحف ومبسوطة وبتعمل تيك توك عادي.
وأضافت: مش كل الناس هجمتني في التعليقات، في ناس شافت إني كنت بصور من بعيد ومفيش أي تجاوز، اللي هاجم مشافش حقيقة الفيديو، وأنا مش همسح الفيديوهات لأنها مفيهاش أي حاجة غلط، الناس اللي في المتحف كانوا شايفين إني بصور من بعيد جدًا.
الفتاة: محدش من أهلي اعترض
وتابعت موضحة انطباعها عن المكان: المتحف يجنن، وحاجة نفتخر بيها كلنا، وأنا خريجة كلية الآثار، وبفتخر بالمكان جدًا.
واختتمت قائلة إن أسرتها تفهمت الموقف بعد توضيح الأمر، قائلة: الفيديوهات عادية جدًا ومحدش من أهلي اعترض، ووالدي قالي لو الفيديو هيعمل مشكلة وضّحي للناس، ولما شرحت له التفاصيل تفهّم الموضوع تمامًا.
ويأتي هذا التعليق بعد انتشار الفيديو على نطاق واسع، حيث ظهرت الفتاة وهي تُصور مقطعًا على طريقة Get Ready With Me أمام تماثيل داخل المتحف، ما أثار انتقادات حادة من بعض المستخدمين الذين اعتبروا أن الفيديو يتضمن عدم تقدير للقيمة الأثرية للمكان.
