مصور سيشن العريس المتوفى اختناقًا بالغاز في المنيا: كان بيسألني على الصور وملحقش يشوفها

قال مينا شاركس، مصور السيشن الخاص بالعريس الذي لقي مصرعه مختنقًا بالغاز في يوم الصباحية داخل شقته بقرية دفش في سمالوط بمحافظة المنيا، إن خبر وفاة العريس كان صادمًا بالنسبة له، ولم يصدقه.

وأضاف في تصريحاته لـ القاهرة 24: العريس كان محترم جدًا وتعامل معايا بذوق من أول يوم، وكان فرحان جدًا بعروسته، والاتنين كانوا بيضحكوا طول السيشن، ومكنتش أتخيل إن ده هيبقى آخر يوم يشوف فيه الصور.

وأردف المصور: قبل الحادث بيومين كان بيكلمني يسألني على موعد تسليم الصور، وكان بيقولي ظبطهم بسرعة نفسي أشوفهم، وكان مستعجل جدًا.. بس القدر كان أسرع.

وشهدت قرية العريس حالة من الحزن الشديد بعد الحادث، خاصة بعد تداول صور الفرح التي التقطها المصور، والتي أظهرت سعادته الكبيرة مع زوجته قبل ساعات قليلة من وفاته.