أول تعليق من زوجة مهندس الإسكندرية المقتول: هدده قبل كده وكان بيحقد عليه
كشفت زوجة المهندس عبد الله أحمد الحمصاني، الذي قُتل في كرموز بالإسكندرية، تفاصيل جديدة عن علاقة زوجها بالقاتل، مؤكدة أن الجريمة لم تكن صدفة بل نتيجة حقد وغيرة دفينة استمرت سنوات.
أول تعليق من زوجة مهندس الإسكندرية المقتول
وقالت زوجة المجني عليه، لـ القاهرة 24: من أيام الخطوبة وجوزي كان بيحكيلي عنه، وكان دايمًا يقولي مش عارف الراجل ده عايز مني إيه، ساعات يقولي إنت صاحبي الوحيد ومليش غيرك، وبعدها يحقد عليه ويقوله إنت كل حاجة بتحتاجها بتلاقيها.
وأضافت: جوزي كان دايمًا بيتهرب منه بعد ما لاحظ غله وحقده وسبق وهدده قبل كده، وأنا حذرته منه، لكن جوزي كان دايمًا بيقولي إنه بيساعده لما بيحتاج، لكن لما لاقاه بيقارن نفسه بيه وبيغير بدأ يبعد عنه.
وأوضحت الزوجة أن القاتل حاول مؤخرًا التقرب من زوجها بطريقة غريبة قائلة: من أسبوع كلمه وقاله أنا مندوب شركة شحن ومعايا طرد هدية ليك، وأنت لازم تستلمه بنفسك، وبعدها فعلًا جوزي كلمني وقالي إنه مستني مندوب الشحن اللي جايب الطرد، وفجأة لاقيته بيكلمني تاني وبيقولي إن اللي جاي هو القاتل، وقعد معاه على القهوة لما شاف أخوه معاه واعتذروا، وكان جايبله تورته وقاله دي هدية البيبي الجديد.
واختتمت الزوجة حديثها قائلة: جوزي كان مسالم ومفيش بينه وبين الناس مشاكل، لكن واضح إن الحقد والغيرة هما اللي قتلوه.
