رسالة مؤثرة من آدم نجل نجم الزمالك الراحل محمد صبري
وجه آدم محمد صبري، نجل محمد صبري نجم الزمالك السابق، والذي رحل عن عالمنا أمس الجمعة إثر حادث أليم.
تصريحات نجل محمد صبري
وقال نجل محمد صبري عبر حسابه على فيسبوك: رسالة إلى عزيزي وحبيبي وأعز الناس لقلبي، مع أمي صاحبي وأخويا وأبويا، كنت يا حبيبي في كلام أكتر حد ناس بترتاح لي، كنت حد كويس أوي وبشهادة كل الناس، وليا كتير معاك حلو كتير أوي.
وأضاف آدم محمد صبري: يوم ما رحت السعودية، رجعت البيت انهرت من العياط وكنت زعلان جدًا عشان هتفارقني، وماما كلمتك فيديو وقلت ليا: أنا عمري ما هبعد عنك، ويوم ما رجعت وكنت جايب ليا جزمة، فرحت بيها فرحة عمري ما هنساها، ويوم ما كان عندي ماتش كورة في المدرسة، نزلت معايا مخصوص وجبت ليا جزمة رمادي، ومكنتش موافق ألبس ستارز عشان خايف على رُكبي، وكنت دايمًا لما حد يتعب تزعل وتتعصب وتلغي كل حاجة عشان تقعد معاه.
وتابع نجل الزمالك السابق السابق: يوم ما روحت أول ماتش ليا في الاستاد، ماتش الزمالك والأهلي مع مستر مازن، عشان أنت كان عندك شغل، وبكلمك أنا وأسر ما بين الشوطين نقول ليك إننا كسبانين 1-0، والفرحة اللي كانت فينا وأنت بتهنّينا، كل يوم لما نرجع من المدرسة ونقعد نتكلم عن ريال وبرشلونة، وتقعد تتريق عليا بسبب الخسارة ونضحك ونهزر طول الطريق، وتقول ليا "مخترع الإسبان"، وأنا بحاول أطلع ليك أسبان من ريال، يا حبيبي، وتنزل من البيت مخصوص مدينة نصر تجيبني، وبعديها تروح تجمع تجيب إخواتي من المدرسة، وبعديها ترجع مدينة نصر تودينا التمرين، وبعديها تروح البيت لوحدك.
وواصل آدم محمد صبري: آخر حاجة يا راجل يا جدع إنك مَرضيتش توديني نادي قوي ومشهور، ومَرضيتش تودينا أنا وأخويا أسر بيتك اللي هو نادي الزمالك، وقلت لولدتي: "مش هيروحوا نادي ولا هيلعبوا هناك غير لما يكونوا قد الفانلة البيضا، لأنها تقيلة، مش لأي حد"، وربِّيتنا على الأصول والجدعنة والرجولة وكل الصفات الحلوة اللي فيك، ويوم ما طلبت منك أجيب القطة وافقت عشان تبقى زي حسنات داخلة لينا، وسمّيتها أنت "بسبوسة"، وإنك كنت قريب ليها وبتِميّزك عن الكل يا حبيبي.
وأكمل نجل محمد صبري: سبت لي مسؤولية كبيرة، أمي حبيبتي اللي هحافظ عليها زي ما أنت وصّيتني، والوصية إني أكون مع إخواتي، هنفضل مع بعض وباقيين على بعض زي ما أنت طلبت، وكان نفسك تروح لمامتك وحماتك اللي هما جدتي، الاتنين أكتر ناس حنّوا عليا، أديك رحت ليهم يا حبيبي واتخطفت منّا.
واختتم آدم محمد صبري: المسيرة الحلوة اللي أنت اتظلمت فيها هتتعوَّض، وهتعب وأشقى أنا وإخواتي التلاتة عشان سيرتك وسط الناس تبقى كويسة زي ما هي يا حبيب قلبي، ولو فضلت أتكلم فيك لحد ما أروح ليك مش هخلص يا حبيب قلبي، تستاهل كل خير.
