خدت 40 ألف جنيه عمولة.. اعترافات المتهم بالتوسط في بيع مسروقات محل مجوهرات بالعجوزة
يواصل القاهرة 24 نشر التحقيقات في قضية القبض على 10 متهمين لسطوهم على أحد محال المجوهرات وسرقة مشغولات ذهبية وعملات أجنبية من داخل المحل تحت تهديد السلاح بمنتصف الليل في العجوزة، وذلك في القضية التي حملت رقم 4249 لسنة 2025.
اعترافات المتهم بالتوسط في بيع مسروقات محل مجوهرات العجوزة
كشفت التحقيقات في القضية، أنه بمثول المتهم أمام جهات التحقيقات المختصة وبسؤاله حول ما معلوماته عن الواقعة؟ أجاب: اللي حصل إن يوم الاثنين 10/3/2025 كلمني جاري في محل سكني السابق في المقطم إ. س وقالي إن ابنه هيجي في محل العطور بتاعي في خان الخليلي وهبعتلك معاه ذهب عشان تبيعه، وسالته الذهب ده بتاع مين؟ قالي ده ورث واحد صاحبي واخواته، ولما سالتوه على الفواتير قالي هي لسه مش معاهم دلوقتي وأول ما تبقى معاهم هبعتهالك.
وأكمل: وافقت وبعدها بحوالي ساعة ابنه جالي المحل فعلًا قعدته وطلعي علبة بلاستيك مدوره شفافة فيها خواتم وأسوار في منها مقطوع ومنها سليم وسلسلتين، واحدة سلیمة وواحدة مقطوعة، خدت منه الحاجة وسبته في المحل وروحت الصايغ في الصاغة في وسط البلد اسمه الحاج حسين عرضت عليه الذهب، قالي الفواتير فين قولتله هاجبهملك بعدين، بناءً على كلام إ. س، وبعدها الحاج ح وزن الذهب طلعوا 240 جراما عيار 18 والحاج حسين ثمنها بـ 780 ألف جنيه وبيعتها فعلا للحاج حسين واداني الفلوس.
وأضاف: ولما رجعت المحل وسألت ابنه أخد العمولة بتاعتي دلوقتي؟ قالي لا انا هاجبلك باقي الذهب بكرة وابقى خد العمولة بتاعتك بكرة، وأنا وافقت عشان خاطر الجيرة اللي بينا واديته المبلغ كله ومشي، وتاني يوم على طول لقيت أحمد بيكلمني بيقولي أنا باقي الذهب معايا قولتله تعالي على المحل، وفعلا جه وقابلته على ناصية شارع الأزهر، وأداني كيس بلاستيك شفاف فيه خواتم وحلقان وغويشتين وما بين عيار 21 وعیار 18، وقالي لما تبيعهم كلمني، وهعدي عليك أخد الفلوس؛ فأنا خدت الدهب وروحت للحاج حسين تاني وزن الذهب طلع 449 جراما، ما بين عيار 18 و21.
واختتم: وقتها ثمنها بمليون و600 ألف جنيه وخدتهم من الحاج حسين وخصمت عمولتي 40 ألف جنيه على البيعة الأولى والثانية، وکلمت أحمد قولتله تعالى وسلمته مليون 650 جنيه ومشي، وبعدين يوم السبت عرفت إن المباحث موجوده عند الحاج حسين وخدوا منه الذهب وبعدين لقيت المباحث عندي في المحل وخدوني عند محل الحاج حسين وسألوني عن مصدر الدهب، قولتهم كل حاجة فخدوني أنا والحاج وحسن على قسم العجوزة.
يذكر أن الدائرة 6 بمحكمة جنايات الجيزة قضت في وقت سابق بتأجيل جلسة محاكمة المتهمين في واقعة سرقة محل مجوهرات خليجي بالعجوزة تحت تهديد السلاح وعن طريق السطو المسلح بمنتصف الليل، لجلسة 26 نوفمبر الجاري لاستكمال سماع مرافعة دفاع المتهمين.
